Мэҥэ – Хаҥалас уһуйааннарын КМО кыайыылаахтарын икки ардыларынааҕы “Ийэм, аҕам уонна м...
Мэҥэ – Хаҥалас уһуйааннарын КМО кыайыылаахтарын икки ардыларынааҕы “Ийэм, аҕам уонна мин – спорду өрө тутар дьиэ кэргэн - 2026” күрэхтэһии алтынньы ый 20 күнүгэр Хара нэһилиэгин Василий Михайлович Егоров аатынан «Чыпчаал» спортивнай комплекска МэҥэХаҥалас улууһун үөрэҕин салалтатын уонна Харатааҕы «Кэрэчээн» уһуйаан тэрийиилэринэн буолан ааста. Күрэхтэһиигэ кустовой методическай холбоһуктартан уопсайа 6 хамаанда кэлэн кыттыыны ылла. • Аллараа Бэстээх «Солнышко» уһуйааныттан – Сергучевтар; • Харатааҕы «Кэрэчээн» уһуйааныттан – Баишевтар; • Н. В. Петров аатынан Дьабыыл оскуола саадыттан – Жирковтар; • Майатааҕы «Кэнчээри» оҕону сайыннарар киинтэн – Новгородовтар; • Павловскайдааҕы “Мичээр” оҕону сайыннарар киинтэн – Соловьевтар; • Табаҕатааҕы «Кэскил» уһуйааныттан – Билюкиннар. Күрэхтэһии 8 көрүҥүнэн ыытылынна. Ол курдук дьиэ кэргэттэр Бэйэни билиһиннэриигэ, уһуну ыстаныыга, аҕалар сиртэн тирэнэн анньыныылара, оҕо уонна ийэ пресс хачайдааһыннара, сыалы таба быраҕыыга, скакалканан ыстаныыга, ыйытыыларга хоруйдааһыҥҥа уонна обручтаах эстафетаҕа илин-кэлин түһүстүлэр. Күрэхтэһиини улуустааҕы оҕо спортивнай оскуолатын директорын үөрэх чааһыгар солбуйааччыта, оҕунан ытыы тренера Артамонова Айталы Дмитриевна, Мэҥэ-Хаҥалас улууһун үөрэҕэх салалтатын оскуола иннинээҕи үөрэхтээһин отделын сүрүннүүр специалиһа Альбина Романовна Захарова, республика таһымнаах судьуйа Иннокентий Петрович Максимов дьүүллээтилэр. Тыҥааһыннаах киирсии түмүгүнэн: • Бастакы миэстэни— Харатааҕы “Кэрэчээн” уһуйааныттан Баишевтар; • Иккис миэстэни — Майатааҕы «Кэнчээри» оҕону сайыннарар кииниттэн Новгородовтар; • Үһүс миэстэни— Аллараа Бэстээх “Солнышко” уһуйааныттан Сергучевтар дьиэ кэргэн ылары ситистилэр. Кыттыбыт дьиэ кэргэттэр бары сертификатынан уонна өйдөбүнньүк бэлэҕинэн наҕараадаланнылар. Ону таһынан бүтүн Россиятааҕы оҕо уонна ыччат хамсааһынын сүрүннүүр специалиһа Айыына Семеновна Матчитова күрэх кыайыылаахтарыгар бэлэхтэри туттарда. Кыайбыт хамаанда ахсынньы ый 12 күнүгэр республикатааҕы күрэххэ улууспут чиэһин көмүскүү киириэҕэ. Баишевтар дьиэ кэргэҥҥэ ситиһиини, дьулууру, кыайыыны баҕарабыт. Мария Тастыгина, Харатааҕы “Кэрэчээн” уһуйаан сүрүннүүр иитээччитэ.