билсибиттэрэ буолла. — 29 сентября 2026 г. в 11:55:25.194
билсибиттэрэ буолла. Бу күн түһүлгэлэри сэргэ кэккэ тэрээһиннэр буоллулар. Ол курдук, ордук дьоһуннаах, туһалаах хайысханан «Сунтаар ийэ тыллаах» - оҕону сайыннарар сахалыы оонньуурдар уонна оонньуулар, сахалыы үөрэтэр босуобуйалары, методическай литератураны көрүү-күрэс быыстапката буолла. 27 уһуйаан иитээччилэрэ, 56 алын кылаас учууталлара, 17 орто сүһүөх оскуола педагогтара бэйэлэрин уопуттарын көрдөрөн, оҥорбут босуобуйаларынан күрэскэ кытыннылар. Уһуйаан иитээччилэригэр Иванова Е.П. (“Сардаана” уһуйаан), Сунтаардааҕы алын кылаас оскуолатын учууталлара (Новикова Г.В., Алексеева А.Г., Калачикова А.С., Михайлова Т.Д., Потапова Н.С.) “Ааҕыы үөрүйэхтэрин бэрэбиэркэлиир тиэкистэр” хомуурунньуктарынан, орто сүһүөх оскуола педагогтарыгар Фокинова Т.А. (ССОШ №1) кыайыылаах үрдүк аатын ыллылар. Маны таһынан, Сунтаар үбүлүөйдээх суруйааччылара Леонид Попов, Аким уонна Ариан Кондратьевтар аналлаах быыстапкалара киэҥ көрүүгэ турдулар. Саха оҕотун сахалыы тыыҥҥа иитиигэ көмөлөөх «Сунтаар түмэллээх» көрдөрөр-иһитиннэрэр быыстапка ыытылынна. Пуорум иккис күнүгэр кыттааччылар «Ийэ тыл алгыстаах аартыга», «Төрүт үгэс төлкөтө, ийэ тыл илгэтэ» түһүлгэлэр тула муһуннулар. Манна педагогическай билим кандидата, Саха Өрөспүүбүлүкэтин Билимин академиятыгар төрөөбүт тылы чинчийэр, харыстыыр, сайыннарар киин сүрүннүүр специалиһа Васильева Надежда Николаевна «Тыл. Өй. Мэйии» диэн дириҥ ис хоһоонноох лиэксийэни оҥордо, чинчийэр үлэтиттэн пуорум кыттыылаахтарыгар сэгэттэ. Салгыы улуустарынан бииргэ үлэлиир бырайыактары торумнуур сыаллаах «Төрөөбүт тыл түмэр түһүлгэтэ» кэпсэтиигэ улуустар бэрэстэбиитэллэрэ көхтөөх кыттыыны ыллылар, санааларын үллэһиннилэр. Ф. В. Габышева түһүлгэлэр үлэлэрин үрдүктүк сыаналаан туран, кэлэр сылы норуот педагогикатын Сылынан биллэриэххэ диэн этиитин кыттааччылар биир санаанан ылыннылар. “Төрөөбүт тыл түмэр түһүлгэтэ” улуустарынан бииргэ сомоҕолоһон үлэлииргэ маннык этиилэри киллэрдилэр: 1. Бүлүү уокуругун улуустарын культурнай кодтарын уратытын көрдөрөр туһугар М.К. Аммосов аатынан Хотугулуу-Илиҥҥи федеральнай университет уонна Аан дойдутааҕы хомус түмэлин кытары сөбүлэҥ түһэрсэн Бүлүү бөлөх улуустара түмсэн бииргэ үлэлииллэрин ситиһиэххэ. 2. Профильнай үөрэхтээһиҥҥэ үрдүкү кылааска (10-11 кылаастарга) саха тылын уонна литэрэтиирэтин чааһын киллэрэргэ. 3. 2027 сылы норуот педагогикатын Сылынан биллэрэргэ. 4. 2027 сыл күһүнүгэр ыытыллар Бүлүүтээҕи үөрэхтээһин пуорумун “Сельская школа: прошлое, настоящее, будущее” диэн тиэмэлээн тыа оскуолатын кэскилигэр, норуот педагогикатыгар туһаайан ыытарга. 5. Саха тылын соргутун кэскиллиир бары улуустар түмсүүлэрэ сомоҕолоһон, аныгы технологиялары туһанан, тиһиктээх үлэни ыытарга. 6. Дьиэ кэргэҥҥэ оҕону сахалыы иитиигэ бастыҥ уопуту өрөспүүбүлүкэ таһымыгар тарҕатарга. 7. Федеральнай таһымнаах ХИФУ төрөөбүт тылга олимпиадатын суолтатын өйдөтөн кыттааччы далааһынын кэҥэтэргэ. Ити курдук икки күн ыытыллыбыт хайысхалар үлэлэрэ кэскиллээх түмүктээх буолла. Тыла суох – омук суох. Инникибитин санаан, норуоппут кэскилин түстүөҕүҥ. Оҕо – норуот кэскилэ. Хайдах тыллаах, өйдөөх-санаалаах көлүөнэни иитэрбитин биһиги: бүгүҥҥү төрөппүттэр, дьиэ кэргэн дьоно бары, уһуйаан, оскуола – быһаарабыт. Ол инниттэн сыралаах үлэ барбыта кыттааччылар сүргэлэрин көтөхтө, саҥа саҕахтары арыйда.