Бэс ыйын 10 күнүгэр Саха өрөспүүбүлүкэтин үөрэххэ уонна наукаҕа миниистирэ Нюргуна Афан... — 11 июня 2026 г. в 02:23:34.748
Бэс ыйын 10 күнүгэр Саха өрөспүүбүлүкэтин үөрэххэ уонна наукаҕа миниистирэ Нюргуна Афанасьевна Соколова Чурапчы улууһугар үлэлээтэ. Улуус киинигэр сылдьан 75 миэстэлээх «Кыталык» оҕо детсадын тутуутун билистэ. Улуус баһылыга С.А. Саргыдаев үөрэхтээһин тиһигэр тыҥаан турар боппуруостары билиһиннэрэн, үлэни-хамнаһы сырдатта. Миниистир күн иккис аҥарыттан Мындаҕаайы нэһилиэгэр тиийэн олохтоох "Ымыы" детсадка ыытылла турар капитальнай ремонт хаамыытын көрдө. 90-нус сыллартан ситиһиилээхтик үлэлиир оҕону эт-хаан өртүнэн чэбдигирдэр «Кустук» лааҕыр баазатыгар сырытта. Манна «Радость” оҕо сайдар киинин дириэктэрэ Ирина Семеновна Сергеева лааҕыр уопсай балаһыанньатын сиһилии сырдатан, инники былааннарын билиһиннэрдэ. Өрөспүүбүлүкэтээҕи “Педагог дополнительного образования: профессиональные вызовы - необходимые компетенции” эбии үөрэхтээһин педагогтарын форумугар кыттыыны ылла. Нюргуна Афанасьевна «Уран уустар түһүлгэлэрэ” быыстапкаларыгар сылдьан айымньылаах педагогтар оҥоһуктарын сэҥээрэн кэпсэттэ. Бу форум биир улахан дьаһалынан дискуссия былаһааккатын үлэтэ буолла. Кэпсэтиини "Юные якутяне" тэрилтэ салайааччыта Соловьев Айал Михайлович иилээн-саҕалаан ыытта. Манна араас улуустартан кэлбит педагогтар, Чурапчы улууһун дьаһалтата, үөрэхтээһин эйгэтин үлэһиттэрэ, эбии үөрэхтээһини сүрүннүүр өрөспүүбүлүкэ тэрилтэлэрэ кыттыыны ыллылар. Нюргуна Афанасьевна эбии үөрэхтээһин тиһигэ өрөспүүбүлүкэҕэ хайдах ыытыллан иһэрин, ханнык хайысхаҕа болҕомтону уурар наадатын бэрт судургутук хас биирдии киһиэхэ өйдөнүмтүөтүк быһааран кэпсээтэ. Эбии үөрэхтээһининэн оҕону-ыччаты хабыыга Сахабыт Сирэ Бүтүн Россия рейтинигэр 2 миэстэҕэ тахсыбытын биллэрдэ. Үлэ алта хайысханан ыытыллар буоллаҕына, чуолаан техническэй, туристическай-краеведческай хайысханы инникитин сайыннарарга сорук турарын, эбии үөрэхтээһин оҕо кэлин идэ ыларыгар бастакы олугу уурарын өйдөөн туран, ол тула үлэни сайыннарарга ыҥырда. Холобур, оскуола театра, спортивнай кулууп, музей үлэтэ курдук үгэскэ кубулуйбут хайысхаларга саҥа методикалары олоххо киллэрии көдьүүстээҕин бэлиэтээтэ. Манна «Юные якутяне” тэрилтэ болҕомтоҕо ылан үлэни тэрийэригэр сорудахтаата. Былаһааккаҕа АГУИКиКИ креативнай индустрия алын академиятын салайааччыта Кириллина Дария Ильинична, Чурапчы улуһун үөрэҕин салалтатын начальнигын солбуйааччы Алена Борисовна Моисеева ыытыллар үлэлэри сырдаттылар. Үгүс үлэни-хамнаһы таарыйар боппуруостары ырытан, бэрт истиҥ кэпсэтии, көрсүһүү буолла.