Самаан сайыммыт үтүө күннэрэ үүннүлэр. Бу кылгас кэрэ кэми оҕолор туһалаахтык атааралла... — 6 июля 2026 г. в 12:55:32.053
Самаан сайыммыт үтүө күннэрэ үүннүлэр. Бу кылгас кэрэ кэми оҕолор туһалаахтык атааралларын туһугар дойду устун араас лааҕырдар тэриллэн үлэлииллэр. Олор истэригэр сыллата профессор Г.П.Башарин аатынан Сылаҥ орто оскуолатын базатыгар «Чэчир» оҕо үлэ уонна сынньалаҥ лааҕыра бэс ыйын 15 күнүттэн үлэлээтэ. Лааҕырга барыта 30 оҕо сырытта. Оҕолор оҕуруокка уу кутуутугар, сыыс ыраастааһыныгар, сибэкки буорун бэлэмнээһиҥҥэ көмөлөстүлэр. Баспытаатал Федорова Зоя Илларионовна оҕолорго интэриэһинэй дьарыктары, тэрээһиннэри ыытта. Үлэни тэҥҥэ дьүөрэлээн спортивнай хайысхаҕа тренер Протодьяконов Юрий Александровичтыын дьарыктаннылар. Лааҕыр биир сүрүн үөрүүлээх түгэнинэн ССРС хас да төгүллээх чөмпүйүөнэ, призера Европа үрүҥ көмүс, Аан дойду Кубогын боруонса призера, 1976 сыллаахха Монреальга ыытыллыбыт Олимпиадаҕа үрүҥ көмүс мэтээл хаһаайына Иванов Александр Николаевичтыын, кини кэргэнинээн оскуола мецената Варвара Афанасьевналыын көрсүһүү буолла. Бу көрсүһүү "Уол оҕо- эр киһи кэскилэ" оскуола иһинэн проект чэрчитинэн ыытылынна. Оҕолор Александр Николаевич кэпсээнин олус сэҥээрэн иһиттилэр, элбэх боппуруостары биэрдилэр. Ону тэҥэ оскуолаҕа үһүс сылын "Трудовой отряд подростков "Башаринцы" үлэһит оҕолор хамаандата үлэлиир. Манна оҕолор түргэнник ситэр кустары көрөн-истэн бүөбэйдээн улаатыннараллар.