Минең ҡарт ҡартатайым, Хәмзә Юлгилдин 1942 йылдың йәйендә хәрби хеҙмәткә саҡырыла. 1943... — 7 мая 2026 г. в 05:22:22.703
Минең ҡарт ҡартатайым, Хәмзә Юлгилдин 1942 йылдың йәйендә хәрби хеҙмәткә саҡырыла. 1943 йылдың декаберендә атаһының “ҡара ҡағыҙы” килеүен ул белмәй. Өс айҙан фронтҡа юлланалар. Тәғәйенләнгән урынға килеп етеү менән Едрово станцияһында урынлашҡан 69-сы артполкта тәүге көндәрҙә строевой һәм огневой әҙерлек менән шөғөлләнәләр. Старшина Шустер Хәмзә Юлгилдинды һәр ваҡыт өлгө итеп күрһәтер булған. Артабан, ҡартатайымдың яугирлек юлы Калинин фронтының Суворов орденлы 27-се Режицкая артиллерия дивизияһының 783-сө айырым разведка дивизионында үтә. Ул стереотрубанан дошмандың ут нөктәләрен асыҡлай, элемтәсе булараҡ штабҡа донесениелар ҙа ташый, разведкаға ла йөрөй. Торопец, Великие Луки ҡалаларын азат итешеүҙә ҡатнаша, Старая Русса, Псков, Валдай, Бологое ҡалаларында оборонала тора. 1943 йылдын ғинуарында беҙҙең ғәскәрҙәр “Демьян ҡаҙанын” уратып алыу һәм дошманды юҡ итеү буйынса һөжүмдәр алып бара. Алыштар бик ҡаты, ҡан ҡойғос була. Ике яҡ та күп кенә һалдатын һәм техникаһын юғалта. Элемтә йыш ҡына эштән сыға, ә уны артиллерия һөжүме һәм бомбаға тотоу ваҡыттарында тәүлек буйына йүнәтеү талап ителә. Шулай бер ваҡыт өҙөлгән элемтәне сафҡа индереү өсөн бер иптәше менән киске сәғәт 4-тә сығып киткән ҡартатайым икенсе көнгә генә әйләнеп ҡайта ала. Уларҙы һәләк булған тип, элемтәселәрҙең икенсе төркөмөн ебәрәләр. Ҡышҡы сатлама 25 градус һалҡында ҡартатайым бер өҙөлгән ерҙе ялғап өлгөрөүгә, икенсе урын бомбаға тотолған, шулай итеп ул төнө буйы элемтәне булдырып, хәлдән тайып, үҙ часына әйләнеп ҡайта. Унан һуң уларҙың часын Старая Руссаға күсерәләр. Бер төркөм элемтәселәргә һәм байҡарҙарға 4 сәғәт эсендә 12 саҡырымдағы алғы һыҙыҡта күҙәтеү пункты төҙөргә һәм элемтә булдырырға ҡушыла. Сыуаҡ апрель көнөндә бөтә кәрәк-яраҡтарҙы йөкмәп, билдән һыу кисеп, барырға тура килә. Әммә был бурыс та ваҡытында үтәлә. 1944 йылдын 10 февралендә Псков эргәһендә “тел алыу” өсөн хәрби заданиены үтәгән ваҡытта ҡартатайым ҡаты яралана, контузия ала. Уны яу яланынан иптәше, Павел Ушаков алып сыға. Биш ай госпиталдә дауаланғандан һуң 6 айға ялға ҡайтарыла. Комиссия уны хәрби хеҙмәткә яраҡһыҙ тип тапһа ла, яңынан һуғышҡа ебәреләсәген һиҙемләй ҡартатайым. Ул Ҡыпсаҡ ауылы һылыуы Нәғимә Аҙнағоловаға өйләнә. Шулай килеп сыға ла, 1927-се йылғы егеттәрҙе Тоцкиға оҙата бара һәм фронтҡа йүнәлергә тейеш була, әммә һуғыш тамамланып өлгөрә. Ҡартатайым зәғиф ҡулдары, ҡаҡшаған һаулығына ҡарамаҫтан һыйыр егеп, ер һөрөргә, иген сәсергә һәм башҡа колхоз эштәренә егелә. Бригадир ҙа, ферма мөдире лә булырға өлгөрә. Һуғыштан һуңғы 1946 йылдын 12 декаберендә үткән беренсе һайлауҙа ауыл Советына Яманғолов Айса – рәйес, ә ҡартатайым сәркәтип итеп һайлана. Артабан уға колхоз рәйесе урынбаҫары һәм рәйесе йөктәрен дә тартырға тура килә. Ә инде колхоздар бөтөрөлгәс, һауын гурты бригадиры һәм хаҡлы ялға сыҡҡансы “Самар” совхозы әҙерләүсеһе булып эшләй. Ҡартатайым, Хәмзә Юлгилдиндын хәрби наградалары эргәһенә тыныс фронттағы фиҙәҡәр хеҙмәтенен баһаһы булып, “Батыр хеҙмәте өсөн”, “Сиҙәм һәм ҡалдау ерҙәрҙе үҙләштергән өсөн” һәм “Хеҙмәт ветераны” миҙалдары, комунистик хеҙмәт ударнигы знагы өҫтәлгән. Был миҙал, ордендарҙы беҙ ҡәҙерләп һаҡлайбыҙ, ҡартатайым әйтеп ҡалдырған васыятын тотоп йәшәйбеҙ. Шулай уҡ бик күп маҡтау ҡағыҙҙары ла бар ҡартатайымдын. Мин шундай Ҡарт ҡартатайым булғанына, сикһеҙ ғорурланам. #ГеройМоейСемьи #НаследникиПобеды #Росмолодёжь #БашМолодёжь