🎼🪇🎻Аан дойдутааҕы муусука күнүнэн алын сүһүөх кылаастар бука бары гимназистары эҕэрд...
🎼🪇🎻Аан дойдутааҕы муусука күнүнэн алын сүһүөх кылаастар бука бары гимназистары эҕэрдэлииллэр! Саха оһоҕун иннигэр олордо да -олоҥхоһут, оҕуһун мииннэ да - ырыаһыт диэн өс хоһооно баар. Муусука - тыла суох кэпсиир, дууһаны таарыйар уонна сүрэҕи сылааһынан толорор туохха да майгыннаабат күүс. Омугуттан, дойдутуттан тутулуга суох муусука киһи олоҕун арыаллыыр доҕоро буоларын өйдөөҥ, оҕолор. Саха сирэ - Олоҥхо дойдута, ырыа куттаах, хомуһуннаах хомус дойдута. Биһиги дойдубутугар хас биирдии оҕо сүрэҕэр муусука баар. Кини кыракый хомуһугар, кырыымпатыгар, күпсүүрүгэр, сэргэх ырыатыгар - бу барыта биһиги олохпут дорҕооно, биһиги үөрүүбүт, биһиги итэҕэлбит. Алгыһынан саҕаламмыт сахабыт ырыата араас көрүҥнэрдээх: дьиэрэтии, тойук, дэгэрэҥ, хабарҕа, таҥалай. Саха ырыата олус уратылаах. Былыр саха дьоно тута хоһуйаллар эбит (импровизация). Үксүгэр анафораҕа олоҕуран айаллар эбит. Кубулуйбат эпитет, аллегория, төхтүрүйүү, тэҥэнэбил үгүстүк туттуллар. Ону таһынан өбүгэлэрбит олус элбэх муусуканы таһаарар инструменнары айбыттар эбит. Охсон оонньонор инструменнар: дүҥүр, күпсүүр, табык. Тыастаах инструменнар: дьаҕа, хоболоох дьаҕа. Чаачардаах инструменнар: кырыымпа, тойук кырыымпа, ох кыл. Тарбах инструменнара: таҥсыр, кылыһах. Тыллаах инструменнар: тимир хомус, мас хомус. Күндү оҕолор, төрөппүттэр, учууталлар! Муусука күнүнэн итиитик-истиҥник эҕэрдэлээн туран, эһиэхэ айар иэйиини, чэгиэн доруобуйаны, үөрүүнү-көтүүнү баҕарабыт! Ырыа-тойук аргыстаныҥ, дьүрүскэн тыаһынан дууһаҕытын угуттааҥ. Муусука эһиги олоххутун мэлдьи сырдата сырыттын! #МузыкаНД #ДеньМузыки #МуусукаКүнэ