Туругура сайда тур, тапталлаах гимназиям!🩵💙💚
Туругура сайда тур, тапталлаах гимназиям!🩵💙💚 Бүгүн, алтынньы 20 күнүгэр, Саха гимназия 25 сыллаах өрөгөйдөөх дэкээдэтин арыйар, үбүлүөй тэрээһиннэрэ саҕаламмыттарын кэрэһэлиир Өрөгөй линиэйкэлэрэ буоллулар. 📜Хас биирдии оскуола бэйэтэ ураты историялаах. Биһиги оскуолабыт 2001 сыллаахха аан бастаан аанын аспыта. Бастакы учууталларбыт, дириэктэрбит олоҕурдубут үгэстэрэ бүгүн да салҕаналлар. 25 сыл анараа өттүгэр Саха немецкэй оскуола бастакы уруоктарын ыытан саҕалаабыта. Бастакы хараҥаччыларбыт 2004 сыллаахха выпусктанан аан дойду устун үөрэх-билии ыла тарҕаспыттара. Күн бүгүн кинилэр номнуо үлэһит бэрдэ буоланнар, дойдуларыгар туһа дьон дэтэн, ийэ-аҕа буолар дьолун билэн, оскуолабытыгар төрөппүт буолан кэллилэр. Ол кэмтэн ыла уопсайа 23 выпуск оскуолаттан кынат анньынан таҕыста. Маҥнайгы выпусктарбытын Андреева Марианна Алексеевна уонна Софронеева Валентина Васильевна иитэн-үөрэтэн, киһи-хара гынан таһаарбыттара! Кыһамньылаах учууталлар сылаас илиилэринэн 45 кылаас үөрэнэн бүтэрдэ! Ол аата, санаан көрүҥ, тыһыынчаттан тахса оҕо! Бүгүҥҥү линиэйкэҕэ оскуола аһыллыаҕыттан айымньылаахтык үлэлии-хамсыы сылдьар учууталларбытын уонна үлэһиттэрбит парааттаан киирбиттэрэ дьон болҕомтотун тарта. Софронеева В.В., Дедюкина Л.Г., Сивцева Е.Н., Куличкина Е.С., Тобонова Н.А., Антонова А.А., Винокурова М.И., Попова С.Е., Необутова Н.Н., Шеломова Н.Ф., Аммосова И.С., Слепцова В.П. Бу оскуола үүнэрин-сайдарын туһугар сүрэхтэринэн-быардарынан кыһаллан үлэлээбит чулуу дьоммут! Үөрэнээччилэр, бу күннэтэ үөрэнэр оскуолаҕытын кининилэр кыһамньылаах илиилэринэн тутан-хабан, оҥорон таһаарбыт дьон буолалларын. Күндү учууталлар, эһиги сыралаах үлэҕит, сылаас сүрэххит иһин муҥура суох махтанабыт! Чулуу учууталларбытыгар, туруу үлэһиттэрбитигэр, кыһамньылаах үөрэнээччилэрбитигэр уонна төрөппүттэрбитигэр үстэ төхтүрүйэн, уруй-айхал! Үүнэ-чэчирии тур, Сахам гимназията! Алтынньы 20 күнүттэн 30 дылы өрөгөйдөөх дэкээдэбит саҕаланна! Бүгүҥҥүттэн ыла үбүлүөйдээх тэрээһиннэрбит таһаарыылаахтык уонна ситиһиилээхтик ыытыллыахтара диэн эрэнэбит!