Монополия сүүрүгүн өксөйбүт “Сулустар”: бар дьон туһугар 1 сыл — 26 июля 2026 г. в 04:33:54.684
Монополия сүүрүгүн өксөйбүт “Сулустар”: бар дьон туһугар 1 сыл “Сулус” хампаанньа историята – ырыынак хабыр киирсиитин классическай холобура. Бар дьон баҕа санаатын туолуутун кэтэҕэр киһи хараҕар дэбигис быраҕыллыбат кытаанах киирсии, сыралаах үлэ, бюрократия иирбэтэ-таарбата – барыта баара. Ол гынан баран, “Сулус” хампаанньа күн бүгүн баар буолуутун саамай улахан кистэлэҥэ – бар дьон өйөбүлэ, таптала уонна эрэлэ! 2025 с. от ыйын 26 күнүгэр “Сулус” хампаанньа “Дьокуускай – Аллараа Бэстээх” хайысханан маршрукка араас административнай харгыһы, “кумааҕы волокитатын” нөҥүөлээн тахсыбыта – дьону тиэйэргэ-таһарга лицензия ылыллыахтааҕа, тиксэр причалы көрдүүргэ бириэмэ эрэйиллэрэ. Ол гынан баран, “Сулустар” саамай улахан харгыһы маршрукка тахсан баран көрсүбүттэрэ. Өскөтүн ити күҥҥэ диэри улахан биллэр тэрилтэ дьону “сыана мантан чэпчиир кыаҕа суох” диэн куоһурданан 1000 солк. туората сылдьыбыт буоллаҕына, “Сулустар” 800 солк. туоратан барбыттара. Ол ыҥырыа уйатын тоҕо тардыбыта. “Үйэ тухары өрүһү тутан олорбут кырдьаҕастар” саҥа тахсыбыт урбаанньыттары самнарар сыаллаах, бу эрэ иннинэ 1000 солк. дии олорон, дьону 300 солк. тиэйэн барбыттара, араас “биһирэммэт ньымалары” туттубуттара. Бары билэрбит курдук, “Сулустар” үлэлээбиттэрэ иккис күнүгэр “кырдьаҕастар” кинилэр катердарыгар причалы бүөлээн кэбиспиттэрэ, дьон сылдьарга табыгаһа суох үрдүк кытыллаах, таастаах сиринэн сылдьарга күһэллибитэ. Кырдьаҕас, оҕолоох дьон букатын да сылдьаллара уустугурбута. Ол гынан баран, ити курдук сиэрэ суох быһыы “кырдьаҕастар” тустарыгар төттөрү эффектэнэн тахсыбыта, бар дьон чиэһинэйэ суох быһыыттан “Сулустары” көмүскүүргэ туруммута. Мэҥэ Хаҥалас, илин эҥээр олохтоохторо, кытылтан улуустарга дьону таһар таксистар, биирдиилээн үтүө сүрэхтээх дьон причалы оҥорор субуотунньукка тахсыбыттара. Ити курдук норуот долгуйан барыбытын кэннэ, от ыйын 28 күнүгэр СӨ Минтранса уонна транспорт прокуратурата мунньахтааннар, “Сулуһу” причалга киллэрэри, антимонополия сокуонун тутуһары ирдээбиттэрэ. Ол түмүгэр, өрүһү туоруур тариф икки бүк түһэн, 500 солк. буолбута! Урукку монополистар “500 солк. – күлүүлээх сыана, чэ, буоллун, нэһилиэнньэни өйүөхпүт” диэн, аат эрэ харата сөбүлэһэргэ күһэллибиттэрэ. Бүгүн онтон бэттэх оруобуна 1 сыл ааста. Оттон “Сулус” холобура күүстээх баҕа санаа уонна норуот өйөбүлэ баар буоллаҕына, чиэһинэй конкуренция дьиҥ үлэлиирин туоһулуур. Сыана икки бүк түһүүтэ бу феномен, туох эрэ дьикти түгэн буолбатах, бу – монополистары хамсатар кыахтаах ырыынак сокуона. Итинник механизымынан өрөспүүбүлүкэ иһигэр авиабилет, тутуу матырыйаалын эбэтэр кырыы нэһилиэктэргэ ас-таҥас сыаната эмиэ түһүөн сөп. Онно саамай сүрүнэ бюрократияны, араас харгыһы утары киирсэргэ бэлэм хорсун дьон уонна биһиги, потребителлэр, өйөбүлбүт эрэ наада. “Сулус” холобура олус үчүгэй рецепт диэххэ сөп: ылсыҥ, ыарахан сыана тиһэх бириигэбэр буолбатах! Бэйэбит уолаттарбытын салгыы даҕаны өйүү туруох, аны күһүнүн-сааһын саҥа суоллары арыйыах!