Иннибитигэр – кыайыы, кэннибитигэр – кырдьык
Иннибитигэр – кыайыы, кэннибитигэр – кырдьык Дойдубутугар судургута суох күн-дьыл үүнэн турар. История хатыланар: эмиэ сүүһүнэн сыллар анараа өттүлэригэр курдук, биһиги судаарыстыбабытын мөлтөтөр, ыһар, үллэстэр сыаллаах тас күүстэр иилии эргийдилэр. Ол гынан баран, билиҥҥи балаһыанньа урукку сэриилэртэн, байыаннай иирсээннэртэн чыҥха атын. Өстөөхпүт биһиги дойдубутун күүһүнэн ылар кыаҕа суоҕун историяттан бэркэ билэр буолан, тактикатын уларытан олорор. Саалаах-сэптээх былыргылыы кимэн киирии сидьиҥ, дойдуну иһиттэн ыһар сытыган сэриинэн солбулунна. Өстөөх билэр: Арассыыйа норуота түмсүүлээх буоллаҕына, хаһан да кыайтарбат. Ол иһин сүрүн болҕомтотун, кыаҕын-күүһүн дойдубут ис балаһыанньатын түөрэҥнэтэргэ уурар. Ол түмүгэр дьон өйүн-санаатын ыһар сүүһүнэн информационнай атаака оҥоһуллар. Сымыйа сурахтары тарҕаталлар, бэрт кыра кыһалҕаттан дойду иэдээнин оҥоро сатыыллар. Ол чаҕылхай холобура – уматык боппуруоһа. Өстөөх ити быстах көстүүнү бүтүн дойду тиһигэ сууллубутун курдук көрдөрө сатыыр, дьону аймыырга, өрө туруорарга дьулуһар. Кини сүрүн соруга – биһиги бэйэ-бэйэбитин утары туруоруу, армиябытыгар, былааспытыгар эрэлбитин сиргэ тэбистэриэн, итэҕэлтэн таһаарыан баҕарар. Дьэ бу курдук уустук кэмнэргэ, “информационнай буурҕа” кэмигэр, уопсастыба төһө сиппитэ-хоппута, кини ис дьиҥэ биллэр үгэстээх. Биһиги барыбыт соруга – албыҥҥа бэриниэ суохтаахпыт. “Дойдубут тула түмсүүлээх буолуох” диэн ыҥырыы кураанах тыл буолбатах, бу – киһи өйдөөн-төйдөөн туран өстөөҕү утары сомоҕолоһор күүһэ! СВО-ҕа көмөлөһүү диэн аҥардас гуманитарнай көмөнү эрэ ыытыы буолбатах. Биһиги күүстээх санаалаах, тулхадыйбат өйдөөх-санаалаах, кыраҕа ымыттыбат буоларбыт Кыайыыны эмиэ чугаһатар. Ол аата өстөөх пропагандатын итэҕэйиэ, сымыйа, бигэргэммэтэх сонуну, сураҕы тарҕатыа, паникалыа суохтаахпыт. Уонна сүрүнэ өрөспүүбүлүкэбит, дойдубут салалтатыгар бүк итэҕэйиэхтээхпит. Өстөөх биһигини мөлтөтүөм, ыһыам-араарыам диэн эрэнэр. Оттон биһиги ол барыта сымыйа буоларын көрдөрүөх! Тулуурдаах, хардарыта көмөлөсүһэр, эрэнсэр уонна дойдубутугар итэҕэйэр эрэ буоллахпытына кыһарҕаннаах кэмнэри туоруохпут. Кыайыы аҥаардас инники кирбиигэ эрэ уһаарыллыбат, кыайыы хас биирдиибит сүрэҕэр иитиллэн тахсар. Онон күүстээх буолуох! Иннибитигэр – кыайыы, кэннибитигэр – кырдьык уонна биир модун историябыт!