УЛУУСПУТ СУОППАРДАРА ӨРӨСПҮҮБҮЛҮКЭТЭЭҔИ СЛЁТ КЫАЙЫЫЛААХТАРА БУОЛЛУЛАР — 20 июля 2026 г. в 11:50:20.673
УЛУУСПУТ СУОППАРДАРА ӨРӨСПҮҮБҮЛҮКЭТЭЭҔИ СЛЁТ КЫАЙЫЫЛААХТАРА БУОЛЛУЛАР Амма улууһугар ыытыллыбыт VIII Өрөспүүбүлүкэтээҕи слетка Мэҥэ Хаҥалас улууһун улахан кыамталаах массыына урбаанньыт суоппардарын түмсүүтэ көхтөөхтүк кыттан, үрдүк кыайыылары ситистэ. Бу тэрээһиҥҥэ улууспут улахан кыамталаах массыына суоппардарын түмсүүтүн салайааччыта Ян Новгородов хамаанданы салайан сырытта. Саха Өрөспүүбүлүкэтин транспорга уонна суол-иис хаһаайыстыбатыгар миниистирэ Владимир Сивцев бэтэрээн суоппардарга Иван Лыткиҥҥа уонна Антон Максимовка «Автомобильнай транспорт бочуоттаах үлэһитэ» түөскэ кэтиллэр бэлиэлэри үөрүүлээх быһыыга-майгыга туттарда. Дьиэ кэргэнинэн сахалыы таҥас күрэҕин кыайыылаахтарынан Мөҥүрүөн нэһилиэгиттэн Ольга уонна Николай Гоголевтар буоллулар. Тимир көлөлөөх кэрэ аҥардарга саха таҥаһыгар Холгума нэһилиэгиттэн «Мэҥэ автоледи» түмсүү чилиэнэ Нана Ефимова эрэллээхтик кыайда. Ырыа күрэҕэр Төҥүлү нэһилиэгиттэн Мичил Заровняев үһүс бочуоттаах миэстэ буолла. Мас тардыһыытыгар 75 киилэҕэ диэри ыйааһыҥҥа бастакы миэстэни Төҥүлү нэһилиэгиттэн Айаал Максимов ситистэ. Эстафетаҕа бастакы миэстэни, ханаат тардыһыытыгар үһүс миэстэни улууспут хамаандата ылла. Тыҥааһыннаах киирсии түмүгэр Мэҥэ Хаҥалас улууһун хамаандата муҥутуур кыайыылаах аатын сүктэ. Суоппардарбытын өрөспүүбүлүкэ таһымнаах күрэххэ улууспут аатын чиэстээхтик көмүскээн, үрдүк ситиһиини ылбыккытынан улууспут дьонун-сэргэтин аатыттан итиитик-истиҥник эҕэрдэлиибит. Суолгут көнө, айаҥҥыт алгыстаах буоллун! Мэҥэ Хаҥалас улууһун дьаһалтатын пресс-сулууспата