ХОДУҺА ХОҺУУТТАРА – 2026
ХОДУҺА ХОҺУУТТАРА – 2026 Атырдьах ыйын 14 күнүгэр Догдоҥо нэһилиэгин Тураахтаах Эбэтигэр, үтүө үгэскэ кубулуйбут үлэһит дьону өйүүр, ыччаты үлэҕэ уһуйар, чөл олоҕу көҕүлүүр сыаллаах, Дойду үрдүнэн Сомоҕолоһуу, Саха Өрөспүүбүлүкэтигэр Култуура, Мэҥэ Хаҥалас улууһугар Олохтоох бэйэ оҥорон таһаарыы Сылларыгар, «Урожай» спортивнай уопсастыба тэриллибитэ 75 сылыгар анаммыт илии хотуурунан от охсуутугар «ХОДУҺА ХОҺУУТТАРА» Өрөспүүбүлүкэтээҕи аһаҕас күрэх буолан ааста. Быйылгы күрэххэ барыта 48 кыттааччы саастарынан арахсан күрэхтэстилэр. Бу күрэҕи Мэҥэ Хаҥалас улууһун, Догдоҥо нэһилиэгин дьаһалталара, тыа хаһаайыстыбатын, спорт уонна култуура салалталара иилээн-саҕалаан ыыттылар. Күрэхтэһии үөрүүлээх арыллыытыгар улуустарынан сэлэлии хааман киирдилэр. Кинилэри уонна ыҥырыылаах ыалдьыттары түсчүт Зиновий Игнатьев арчылаата, күрэх этэҥҥэ барарыгар алгыс сиэрин-туомун толордо. Саха Өрөспүүбүлүкэтин былааҕын Александр Протопопов, Вячеслав Окороков, Иван Тихонов өрө күөрэттилэр. Үлэ дьонугар анаммыт күрэҕи Саха Өрөспүүбүлүкэтин бырабыытылыстыбатын бэрэссэдээтэлин солбуйааччыта Сергей Местников, улууспут баһылыга Дмитрий Тихонов, Саха Өрөспүүбүлүкэтин тыатын хаһаайыстыбатын уонна ас-үөл бэлиитикэтин миниистирин эбээһинэһин толорооччу Анна Стручкова, «Биир ньыгыл Арассыыйа» баартыйаттан РФ Суудаарыстыбаннай Дууматын дьокутаатыгар хандьыдааттар Саха Өрөспүүбүлүкэтин ыччат уонна социальнай коммуникацияҕа миниистирэ, Петр Шамаев, боксаҕа Европа икки төгүллээх чөмпүйүөнэ, Аан дойду чөмпүйэнээтин үрүҥ көмүс призёра, Арассыыйа спордун үтүөлээх маастара Василий Егоров, РФ физическэй култууратын уонна успуордун үтүөлээх үлэһитэ Прокопий Готовцев эҕэрдэ тылларын эттилэр, үтүө үлэһит дьоммутугар наҕараадалары туттардылар. «Күүлэй 2026» өрөспүүбүлүкэтээҕи илиинэн от охсуу күрэҕэ ыытыллыбытынан сибээстээн, үрдүк сатабылын, норуот үгэстэригэр бэриниитин уонна төрүт култуурабыт утумун харыстааһыҥҥа улахан кылаатын киллэрбитин иһин остуолга ууруллар бэлиэлээх грамотатынан Дохсун Ворогушин, Надежда Авелева, Октябрина Шарина наҕараадаланнылар. Тыа хаһаайыстыбатын сайдыытыгар өҥөлөрүн, өр сыллаах үтүө суобастаах үлэтин иһин Саха Өрөспүүбүлүкэтин агропромышленнай холбоһук бочуоттаах үлэһитэ аат Василий Бурнашевка иҥэрилиннэ. Саха Өрөспүүбүлүкэтигэр сир сыhыаныгар өҥөлөрүн, өр сыллаах үтүө суобастаах үлэтин иһин Саха Өрөспүүбүлүкэтин баайга-дуолга уонна сир сыhыаныгар министиэристибэтин түөскэ иилиллэр бэлиэтинэн Мария Макарова наҕараадаланна. Саха Өрөспүүбүлүкэтигэр тыа хаһаайыстыбата сайдыытыгар өҥөлөрүн, өр сыллаах үтүө суобастаах үлэлэрин иһин Саха Өрөспүүбүлүкэтин тыатын хаһаайыстыбатын миниистирин Бочуоттаах грамотатынан Василий Окороков наҕараадаланна. Күрэхтэһии сүрүн судьуйатынан өрөспүүбүлүкэ категориялаах судьуйа Дмитрий Сидоров үлэлээтэ. От охсооччулар ходуһаҕа киирэн, сэрэбиэй түмүгүнэн түбэспит сирдэригэр түөрт чаас усталаах күрэхтэһиигэ түһүннүлэр.