ХАРА НЭҺИЛИЭГЭР «ҮТҮӨ БАЛАҔАН» АРЫЛЫННА!
ХАРА НЭҺИЛИЭГЭР «ҮТҮӨ БАЛАҔАН» АРЫЛЫННА! Бүгүн, балаҕан ыйын 15 күнүгэр «Үтүө балаҕан» диэн ааттаммыт кэрэ-мааны балаҕаны, өбүгэлэрбит үтүө үгэстэрин тутуһан, Вероника Анатольевна уонна Виталий Валерьевич Очировтар дьиэ кэргэн бэйэлэрин үптэринэн туттаран, бүгүн үөрүүлээх быһыыга-майгыга арыйдылар. Сахалыы сиэринэн-туомунан Үрдүк Айыылартан көрдөһөн, алгысчыт мааны алаадьылаах, уохтаах кымыстаах айах тутан, саламаны иилии тардан, арчыланан-ыраастанан, саҥа эйгэ аартыга арылынна. Бу — дьиҥ саха куттаах ыал төрүт үгэскэ тирэҕирэн, норуокка үйэлээҕи оҥорон хаалларар сырдык баҕа санааларын туолуута буолар. Бу сүдү тутуу, удьуор утум уһуктар уйата буолуоҕа. Манна илиинэн тигиллибит сахалыы таҥас-сап, мас ууһа чочуйбут ытык иһитэ-хомуоһа, талба талааннаахтарбыт айбыт-туппут кэрэ оҥоһуктара үйэтитиллиэхтэрэ. Түмсэр сирбитигэр түс-бас дьоммут, ытык кырдьаҕастарбыт ыллыктаах тыллара, муударай сүбэлэрэ тохтообокко кутуллуоҕа. Ырыа-тойук, хомус тойуга, олоҥхо бухатыырдарын куоталаһыыта, көр-күлүү көҕүлүттэн тутуллар киэһэлэрэ мантан саҕыллыахтара. Маны таһынан нэһилиэкпит инники кэскилин торумнуур, тыабыт сирин сайдыытын хайысхаларын ырытыһар, биир сомоҕо буолан кыайтарыа суох курдук кыһалҕалары быһаарсар күндү түһүлгэбитинэн буолуоҕа. Вероника Анатольевнаҕа, Виталий Валерьевичка барҕа махталбытын биллэрэбит! Эһиги бу үтүө холобургут, амарах санааҕыт, дойдуга тапталгыт кэлэр көлүөнэҕэ бэриллэн истин, удьуоргут утумун салҕаатын! Хаартыскалары бу сигэнэн көр: https://drive.google.com/drive/folders/14bGyMtyAk-1JLxkMakcLHX2vVcdStf40 Мэҥэ Хаҥалас улууһун дьаһалтатын пресс-сулууспата.