Спорт адаптивнай көрүҥнэригэр «Дьулуур» Саха сирин XV Спартакиадатыгар биһиги улуус хам... — 10 июня 2026 г. в 09:22:06.894
Спорт адаптивнай көрүҥнэригэр «Дьулуур» Саха сирин XV Спартакиадатыгар биһиги улуус хамаандатыгар ситиһиини! Бэс ыйын 15-19 күннэригэр Дьокуускай куоракка спорт адаптивнай көрүҥнэригэр «Дьулуур» Саха Республикатын XV Спартакиадата ыытыллыаҕа. Бу улахан эппиэттээх күрэхтэһиилэргэ биһиги улуустан барыта 44 доруобуйаларынан хааччахтаах дьоммут баран, улууспут чиэһин көмүскүөхтэрэ. Үөһээ Бүлүү улууһуттан барыта 49 киһиттэн турар делегация барара былааннанар. Бүгүн, бэс ыйын 10 күнүгэр, улуус дьаһалтатын мунньахтыыр саалатыгар Спартакиадаҕа барыах иннинэ түмүктүүр сүбэ-мунньах тэрилиннэ. Мунньаҕы улуус баһылыгын социальнай боппуруостарга уонна дьиэ кэргэн политикатыгар солбуйааччыта Анна Уларова салайан ыытта. Спортсменнар сүүрүүгэ «Туймаада» стадиоҥҥа, олорон эрэн волейболга – «Модун», голболга – «Модун» спорткомплекска уонна ДЮСШ-ҕа сытыы, тыҥааһыннаах киирсиилэргэ күөн көрсүөхтэрэ, кыахтарын тургутуохтара. Көрүҥнэринэн араардахха, чэпчэки атлетикаҕа – 18, ол иһигэр харахтарынан мөлтөхтүк көрөр дьоҥҥо: 6, мөлтөхтүк истээччилэргэ: 6, сүһүөхтэрэ ыалдьар дьоҥҥо – 5; бытаан сайдыылаахтарга сүүрүүгэ – 2, голболга дьахталларга – 5, эр дьоҥҥо – 4, остуол тенниһигэр: мөлтөхтүк истэр дьоҥҥо – 4, сүһүөхтэрэ ыалдьар дьоҥҥо – 4; буулдьанан ытыыга: мөлтөхтүк истээччилэргэ – 1, сүһүөҕэ ыалдьар дьоҥҥо – 5, олорон эрэ волейболга – 7, традиционнай оҕунан ытыыга – 2, тус сыаллаах байыаннай дьайыы кыттыылаахтарыттан – 2 спортсмен кыттыыны ылыахтара. Билиҥҥи балаһыанньанан, кыттааччылар кроссовкалара, суумкалара кэлэн тураллар. Спортсменнары 2 автобус уонна «Хайс» массыына илдьэрдии, билигин техническай туруктарын көрүнэ сылдьаллар. Биһиги улуус делегацията олимпийскай резервэ уопсайыгар түһүөхтэрэ, онно хонугар 1000 солк., күҥҥэ үстэ аһылык иһин 1000 солк. үп көрүллүбүт. Улуус инбэлииттэрин обществотын салайааччыта Зоя Петрова этэринэн, сарсын, өйүүн медцинскэй көрүүлэр түмүктэниэхтээхтэр. Тренердэр састааптара маннык: чэпчэки атлетикаҕа – Раиса Григорьева, голболга – Василий Васильев, олорон эрэ волейболга - Харлампий Терентьев уонна ытыыга – Лаврентий Карадчин. Улууспут киэн туттар тренерэ Раиса Васильевна этэринэн, биһиги хамаандабыт чэпчэки атлетика көрүҥэр кырата 10 мэтээли аҕалардыы былааннанар. Бэс ыйын 14 күнүгэр Түгэхтэй алааһыгар сарсыарда 9 ч. 30 мүн. спортсменнарбыт этэҥҥэ, ситиһиилээхтик сылдьалларын туһугар алгыс түһэриэхтэрэ уонна Дьокуускай куоракка атаарыахтара. Күндү спортсменнарбытыгар бу улахан эппиэттээх, республика таһымнаах Спартакиадаҕа туохтан да иҥнибэккэ-толлубакка, улууспут чиэһин туһугар туох баар кыахтарын ууран туран чаҕылхайдык киирсэллэригэр, ситиһии сиэтиилээх, үөрүү үктэллээх дойдуларыгар эргиллэн кэлэллэригэр баҕарабыт! Галина Васильева #Адаптивнайспорт #Спартакиада #Чөлолох #Көмүскэл