Күндү биир дойдулаахтарым, ытык-мааны ыалдьыттар! — 24 июня 2026 г. в 00:30:15.102
Күндү биир дойдулаахтарым, ытык-мааны ыалдьыттар! Үөһээ Бүлүү улууһун дьаһалтатын уонна тус бэйэм ааппыттан эһигини Россияҕа Норуоттар Сомоҕолоһууларын, Саха сиригэр Култуура, Үөһээ Бүлүүгэ Үөрэҕирии систиэмэтэ төрүттэммитэ 150 сылыгар аналлаах үрүҥ илгэни тарҕатар, үтүө санааны үксэтэр, үүнэр кэскили түстүүр Үрүҥ Тунах ыһыахпытынан истиҥник эҕэрдэлиибин! Быйылгы ыһыахпыт ураты суолталаах. Арассыыйаҕа Норуоттар Сомоҕолоһууларын сылыгар, Саха Өрөспүүбүлүкэтигэр Култуура сылыгар, оттон биһиги Үөһээ Бүлүүбүт улууһугар үөрэҕирии ситимэ төрүттэммитэ 150 сыллаах үбүлүөйүгэр ананар. Бу үс улуу бэлиэ дааталар биһиги олохпутугар, сайдыыбытыгар хас биирдии киһиэхэ сүҥкэн суолталаахтар. Норуоттар сомоҕолоһуулара – биир дойду дьонун сомоҕолуур, күүһүрдэр, сайдыы суолугар сирдиир сүрүн тирэх. Култуура – биһиги тыыннаах историябыт, өбүгэбит кэриэһэ, кэнчээри ыччаппыт кэскилэ. Оттон үөрэҕирии – киһи-аймах сайдыытын сүрүн төһүүтэ, дьолу, сырдыгы аҕалар, кэлэр кэми түстүүр биһик. Биһиги улууспутугар 150 сыл анараа өттүгэр төрүттэммит үөрэҕирии систиэмэтин салҕааччылар буоларбытынан, өрөспүүбүлүкэбит үөрэҕириитигэр биһиги улууспут киллэрбит кылаатынан киэн туттабыт! Ыһыах күн айылҕа бары күүһэ, үтүөтэ мустар, күн алгыһа этиллэр, үрүҥ илгэ түһэр. Бу күн биһиги биир сомоҕо буолан, өбүгэбит үгэһин салҕаан, Үөһээ Бүлүүбүт чэчирии сайдарын туһугар кэскили кэпсэтэ, саргыны салайса, уйгуну уһанса, тускуну туһаайса күүс-уох ылынабыт. Бука барыгытыгар чэгиэн доруобуйаны, дьолу-соргуну, үлэҕитигэр үрдүк ситиһиилэри, дьиэ кэргэҥҥитигэр этэҥҥэ буолууну баҕарабын! Уруй-Айхал! Дириҥ ытыктабылы кытта, Үөһээ Бүлүү улууһун баһылыга Валерий Николаев