“Яшьлек” спорткомплексы территориясендә Халыкара балаларны яклау көне уңаеннан зур бәйр... — 1 июня 2026 г. в 14:03:23.577
“Яшьлек” спорткомплексы территориясендә Халыкара балаларны яклау көне уңаеннан зур бәйрәм чарасы үтте. Район башлыгы Альберт Хуҗин балаларны бәйрәм белән котлап, күңелле яллар, җәйнең һәр көнен файдалы үткәрүләрен теләде. Бәйрәм чарасында “Балалар илне рәсемгә төшерә” республика конкурсының икенче этабында җиңү яулаган балаларга истәлекле бүләкләр тапшырылды. “Кәгазьгә икенче тормыш” акциясенә нәтиҗә ясап, иң күп күләмдә — 9300 килограмм макулатура җыйган Мөслим гимназиясе коллективы хөрмәтләнде. Гимназия директоры Азат Мирзаяновка “ЭкоЛаб” компанияләр төркеменең социаль проектлар җитәкчесеннән һәм “Гринта” компаниясеннән бүләкләр тапшырылды. Бәйрәм җыр-биюләргә дә бай булды. Балалар сәнгать мәктәбендә шөгыльләнүче балаларның һәр чыгышын тамашачылар көчле алкышларга күмде. Балалар бакчалары да бәйрәмгә ныклы әзерлек белән килгәннәр иде. Елдагыча бәйрәм чарасында остаханә мәйданчыклары да эшләде. “Офык” мәктәптән тыш эшләр үзәге, балалар сәнгать мәктәбе, үзәкләштерелгән китапханә, спорт мәктәбе, “Мизгел” яшьләр үзәге белгечләре нәни кызлар һәм малайлар өчен кызыклы осталык дәресләре һәм уеннар оештырды. Лилия Шәймиева репортажы. #бүген_Мөслимдә #БалаларныЯклауКөне #Мөслим #БәхетлеБалачак