Җәй айларында Мөслим районы мәчетләрендә балалар өчен әхлак һәм сәламәтлек яллары оешты... — 16 июля 2026 г. в 10:16:19.270
Җәй айларында Мөслим районы мәчетләрендә балалар өчен әхлак һәм сәламәтлек яллары оештырыла. Әлеге яллар вакытында балалар Коръән уку нигезләрен үзләштерә, ислам әхлагы, өлкәннәрне хөрмәтләү, дуслык, шәфкатьлелек кебек кыйммәтләр турында белем ала. Моннан тыш, алар өчен күңелле уеннар, спорт ярышлары, иҗади дәресләр һәм төрле мавыктыргыч чаралар үткәрелә. Июнь аенда Мөслим мәдрәсендә мондый яллар кыз балалар өчен үткәрелсә, 29 июньнән 5 июльгә кадәр "Разалия" мәчетендә 7 яшьтә алып 14 яшькәчә малайлар ял итте. Агымдагы атнада авылларда, Мөслимнең Җәмигъ мәчетендә дә мондый яллар оештырылды. Тойгелде авылында әхлак яллары Кыйбла мәчетендә дә, Яшел мәчеттә дә алып барыла. Кызлар һәм ир балалар өчен аерым төркемнәр оештырылган. 5 көнлек ялларны файдалы оештыруда яшерен сәдакалар тотыла, ата-аналар, авылның игелекле кешеләре өлеш кертә. Дәресләрне, уеннарны абыстайлар имамнар, кайбер авылларда Мөхәммәдия мәдрәсәсе шәкертләре оештыра. Муса хәзрәт Шамилев әйтүенчә, мондый яллар һәр мәхәлләдә 10-30 балага файдалы белем тупларга, сәламәт яшәү рәвешенә омтылыш тәрбияләргә, яңа дуслар табарга һәм җәйге каникулларын эчтәлекле үткәрергә ярдәм итә. Гөлназ Җәлилова. Фотода - Тойгелде авылының Яшел мәчетендә һәм Кыйбла мәчетендә әхлак дәресләре. #дин_вә_вөҗдан