Шылгараңгай, хөй талалыг салым-чаяанныг Тываның Улустуң чогаалчызы Эдуард Баирович Мижи...
Шылгараңгай, хөй талалыг салым-чаяанныг Тываның Улустуң чогаалчызы Эдуард Баирович Мижит турган болза 2026 чылдың апрель 22-де 65 харлаар турган. Тыва чогаалда балалбас исти арттырып каан чогаалчының юбилейлиг чылынга тураскаадып А. С. Пушкин аттыг Национал ном саңында Э. Б. Мижиттиң чогаадыкчы ажыл-ижинге тураскааткан неделя болуп эртип турар. Эдуард Баирович Мижит – башкы, шылгараңгай шүлүкчү, Тыва Республиканың Улустуң чогаалчызы,ТР-ниң уран чүүлүнүң алдарлыг ажылдакчызы, шиичи, прозачы, очулдурукчу, чогаал шинчилекчизи, редактор, сценарист, Тываның болгаш Россияның Чогаалчылар, Россияның театр эвилелдериниң кежигүнү. ТР-ниң «Күш-ажылчы шылгарал дээш» деп медалының, Национал литература шаңналының база өске-даа хөй-хөй шаңнал-макталдарның эдилекчизи, янзы-бүрү чогаал мөөрейлериниң тиилекчизи чораан. Ол 1961 чылдың апрель 22-де Улуг-Хем кожууннуң көгү-шыгы хөлбелчиңнээн, каас-чараш бойдус чурумалдыг Торгалыг суурга төрүттүнген. Чааты ортумак школазын, Москвада М. Горький аттыг литература институдун дооскан. Тываның ном үндүрер черинге чечен чогаал редакторлап, республиканың хөгжүм-шии театрының литература кезээн эргелекчилеп, «Тываның аныяктары» солуннуң кол редакторунга, «Улуг-Хем» сеткүүлдүң шүлүк чогаалының килдизинге редакторлап, Тываның гуманитарлыг шинчилелдер институдунуң литература секторунга улуг эртем ажылдакчызынга, Тываның Чогаалчылар эвилелиниң даргазынга, «Улуг-Хем» сеткүүлдүң кол редактору бооп ажылдап чораан. «Чалгыг» болгаш «Роза ветров» деп чогаадыкчы студияларны тургузуп, чогаалга сонуургалдыгларны хаара тудуп, чечен-мерген дылдың чечектиг аяңынче чедип, углап-баштап, дыка хөй аныяктарга арга-сүмезин кадып, дээштиг дузазын, деткимчезин көргүзүп, үре-түңнелдиг ажылдап чораан. Чогаал ажылын 1980 чылдан эгелээн. Ооң шүлүктери республика солуннарынга, «Улуг-Хем» сеткүүлүнге, республикадан дашкаар «Литературная Россия» «Литературная газета» солуннарга, «Собеседник», «Юность», «День поэзии», «Истоки» сеткүүлдерге, «Орус верлибр антологиязынга» база «Кезерниң балдызы» деп хөй авторлуг чыындыга парлаттынгылаан. Шүлүктериниң баштайгы чыындызы «Бузундулар» деп ат-биле 1992 чылда чырыкче үнген. Шылгараңгай, хөй талалыг салым-чаяанныг чогаалчывыстың кайгамчык, бир тускай, онзагай аян-биле бижиттинген номнарын сонуургап номчуурун сүмеледивис: «Бузундулар»: верлибрлер (1992), «Казыргылыг кудуктуң кыйгызы»: проза-шүлүктер (2002), «Кара-Дагның казыргызы»: шии (2003), «Бɵдүүн одуруглар»: шүлүктер болгаш шүлүглелдер (2006), «Туман ɵттүр отчугаштар»: верлибрлер (2008), «Ɵргүл»: шилиттинген шиилер (2010), «Расколотый миг»: верлибры (2011), «Течик»: бичии уругларга номнар (2014, 2015), «Кто ты, Субедей-Багатур?»: орус дылче очулга (2019), «Амыдырал, амыдырал…»: шүлүктээн роман (2023), «Чажыт чырык»: шүлүктер, угаадыглар, шүлүглелдер, ырылар (2024).