Өгбе чогаалчывыс Чооду Күнзекович Кара-Күске Национал ном саңы-биле, эгин кожа, бүгү чо...
Өгбе чогаалчывыс Чооду Күнзекович Кара-Күске Национал ном саңы-биле, эгин кожа, бүгү чогаадыкчы ажыл-амыдыралының сөөлгү хүннеринге чедир сырый харылзаалыг ажылдап, хѳй-хѳй солун болгаш ѳѳредиглиг хемчеглерге идепкейлии-биле киржип, бурунгаар көрүштүг, ажыктыг арга-сүмезин кадып, бодунуң бодалдары-биле ажыт-чажыт чокка үлежип чораан сүмелекчи башкывыс, дагдыныкчывыс чораанын улуг хүндүткел-биле үнелээр-дир бис. Мерген угаанныг чогаалчывыс чоокта чаа бистиң ном саңының 95 харлаан юбилейинге уткуштур, уран-чечен шүлүүн база сөөлгү үндүрген «Дыңна, Диис» деп номун белекке эккеп бергенин чоргаарал-биле сактып тур бис. Солун долган, номнар чыылган Сонуурганчыг библиотекам. Күзелимни хандырар дээш, Хүннүң келир библиотекам. «Маңаа номдан номчу» дээнзиг Манап турар библиотекам. Өргүн чонга, ажы-төлге Өргээ болган библиотекам Эртемден-даа кижи келгеш Эжиин ажар библиотекам. Хөгжүм ойнап, ырлап, самнап Хөглеп алыр библиотекам Хөйге чонга бараан болуп, Хөгжүде бээр библиотекам. Хире-хире хүннүң-не-даа Кирип келир библиотекам. Бижиттинип, номчуттунуп Билиг немээр библиотекам. «Пушкинивистиң 95 чылы-биле, 90 харлыг автордан». Бүгүдеге үлегерлиг, кижизиг, биче сеткили хемчээттинмес, кылган ажыл-херээ ак-көк дээр дег, алгыг-делгем хүндүлүг чогаалчывыстың бүгү тыва ниитилелге, уран чүүлге, чогаалга ооң ужур-дузазын шуптузун адап санап үнелээри болдунмас, эгээртинмес өнчү бооп, кезээ мөңгеде артар.