Култуура идэтийбит сойуустарын ыһыаҕа: Саха норуотун тыына уонна сомоҕолоһуута — 4 июня 2026 г. в 11:20:06.839
Култуура идэтийбит сойуустарын ыһыаҕа: Саха норуотун тыына уонна сомоҕолоһуута Бэс ыйын 3 күнүгэр Үс Хатыҥ аттынааҕы Кымыс Байбал диэн ааттаах-суоллаах сиргэ култуура идэтийбит сойуустарын ыһыаҕа ыытылынна. Бу култуура эйгэтин кэҥэтэр уонна кэскилин түстүүр үтүө сыаллаах тэрээһин Россияҕа Норуоттар доҕордоһууларын сылын уонна Саха сиригэр Култуура сылын иитинэн тэрилиннэ. Култуура уонна маассабай информация үлэһиттэрин өрөспүүбүлүкэтээҕи кэмитиэтэ икки сыл аайы ыытар ыһыаҕар култуура тэрилтэлэрин уонна СМИ идэтийбит сойуустарын чилиэннэрэ мусталлар. Ыһыах, үгэс быһыытынан, алгыс этиитин сиэринэн-туомунан арылынна. Ону тэҥэ бырагырааманан араас тэрээһиннэр буоллулар: түһүлгэ киэргэтиитин куонкуруһа, тэрилтэлэр үөрүүлээх параадтара, наҕараадалааһын сиэрэ, «Ньургун Боотур уонна Кыыс Дэбилийэ» пааранан спортивнай күрэхтэһии, ону тэҥэ оһуохай этээччилэрин куонкуруһа. Ону кытта сыл аайы култуура үлэһиттэрин идэтийбит сойуустарын спартакиадатын тэрийииттэн саҕаланар. Бу спартакиадалар кэлэктиип биир сомоҕо тыынын умнуллубат түгэннэригэр кубулуйдулар. Бу бэлиэ күн култуура үлэһиттэрин бүтүн россиятааҕы идэтийбит сойуустарын өрөспүүбүлүкэтээҕи салаатын иһинэн ыытыллыбыт XXV-с култуура уонна көрдөрөр-иһитиннэрэр хампаанньалар үлэһиттэрин идэтийбит сойуустарын спартакиадатыгар кыайыылаахтары наҕараадалаатылар — «Саха» НКИХ кыайыылаах үрдүк аатын ылла. Наҕараадалааһыҥҥа СӨ Култуураҕа миниистирэ Афанасий Ноев эҕэрдэ тылы эттэ. «Бүгүҥҥү ыһыахпыт бары ытык-мааны кыттыылаахтара, култуурам дьоно! Эһигини барыгытын Улуу Туймаада хочотун киэҥ нэлэмэн сыһыытыгар, ытык сиргэ, төрүт култуурабыт эйгэтин кэҥэтэр уонна кэскилин түстүүр, Үрдүк Айыыларга сүгүрүйэр күммүтүнэн эҕэрдэлиибин! Ил Дархан Айсен Николаев эппитин курдук, култуураҕа биһиги тылбыт, итэҕэлбит, сомоҕолоһуубут күүһэ баар. Онон култуура эйгэтигэр үлэлии сылдьар дьон бу маны өрүүтүн өрө тутан биһиги норуоппутун, дьоммутун-сэргэбитин сомоҕолуу туруоҕуҥ! Барыгытыгар барҕа махтал буоллуҥ. Дьолу-соргуну, ситиһиини уонна эйэлээх, дьоллоох буолуҥ!», — диэн миниистир эҕэрдэлээтэ. Бу ыһыах култуура үлэһиттэрин түмэр уонна саҥа ситиһиилэргэ күүс-көмө буолар суолталаах тэрээһин буолла.