Саха сиригэр уматык хампаанньаларыгар 7388 туонна бэнсиин уонна 13617 туонна дизель ума... — 31 июля 2026 г. в 09:48:44.211
Саха сиригэр уматык хампаанньаларыгар 7388 туонна бэнсиин уонна 13617 туонна дизель уматыга айаннаан иһэр Бүгүн өрөспүүбүлүкэҕэ уматык хампаанньаларга анаан 7388 туонна бэнсиин уонна 13617 туонна дизель уматыга айаннаан иһэр. Уопсайа 1334 богуон эбэтэр 82 тыһыынча туонна уматык айаннаан иһэр, итинтэн сүрүн чааһа бырамыысыланнас хампаанньаларыгар анаммыт. Бу туһунан брифиҥҥэ СӨ Гражданскай көмүскэлгэ миниистири солбуйааччы Яна Наумова иһитиннэрдэ. «Өрөспүүбүлүкэҕэ уматыгынан хааччыйыы балаһыанньаны бигэтитии үлэтэ салҕанар. РФ Бырабыыталыстыбата хотугу таһаҕаһы тиэйиини хааччыйыыга, ол иһигэр биһиги региоммутугар ураты болҕомтону уурар. РФ Бырабыыталыстыбатын бэрэссэдээтэлин солбуйааччы Александр Валентинович Новак ыстаабын мунньаҕын түмүгүнэн, балаҕан ыйа бүтүөр диэри ньиэп бородуукталарын тиэйии кээмэйдэрэ бигэргэннилэр», — диэн Яна Наумова эттэ. Өрөспүүбүлүкэ хотугу таһаҕас чэрчитинэн 105,5 тыһыынча туонна бэнсиини, 71,9 тыһыынча туонна дизель уматыгын уонна 5,5 тыһыынча туонна авиационнай кэрэһиини ылыаҕа. Бу кээмэйдэр өрөспүүбүлүкэ уматык хампаанньаларыгар тарҕатыллыбыттар. Миниистири солбуйааччы этэринэн, регионнааҕы оператордар ньиэп хампаанньаларын кытта дуогабардары түһэрсиини уонна региоҥҥа уматыгы тиэйиини тэрийиини ылсан эрэллэр.