Саха сиригэр Федор Охлопков кэриэһигэр анаммыт снайпинг турнира аан дойдутааҕы таһымнан... — 31 июля 2026 г. в 04:07:01.256
Саха сиригэр Федор Охлопков кэриэһигэр анаммыт снайпинг турнира аан дойдутааҕы таһымнаныаҕа Сэбиэскэй Сойуус Дьоруойа Федор Охлопков аатынан ыраахха ытыы төрдүс турнирыгар номнуо түөрт дойдуттан сайаапкалар киирдилэр. Бу туһунан Дьокуускайга РФ Бырабыыталыстыбатын бэрэссэдээтэлин солбуйааччы — Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев тэрийэр хамыыһыйа мунньаҕын кэнниттэн иһитиннэрдэ. «Турнир аан дойдутааҕы таһымҥа тахсыаҕа. Бүгүҥҥү күҥҥэ номнуо түөрт дойдуттан сайаапка киирэн турар. Биһиги, биллэн турар, кэллиэгэлэрбит сайаапкаларын бигэргэттэхтэринэ, кинилэри ыҥырыахпыт. Мунньахха турнир дьиҥ-чахчы аан дойдутааҕы таһымҥа эппиэттиирин курдук, ону тэҥэ бэлэмнэнии үрдүк таһымнаахтык ыытылларын туһугар боппуруостар көрүлүннүлэр», — диэн Юрий Трутнев эттэ. Чопчу ытыыга «Боевой снайпинг» дьиссипилиинэҕэ күрэхтэһиилэр 2026 сыл алтынньытыгар «Сулус» кииҥҥэ ыытыллыахтара. «Сулус» киин аныгы инфраструктуралаах уонна дойду биир бастыҥ былаһааккатынан ааҕыллар. Манна аан дойдутааҕы турниры ыытыы регион бэлэмин үрдүк таһымын бигэргэтэр. Ордук болҕомтону эрдэҕэс оҕолорго аналлаах туспа тэрээһини ыытыы ылар. Маннык күрэхтэһиилэр эппиэтинэһи, дьиссипилиинэни, хамаанда тыынын уонна дойду устуоруйатыгар ытыктабылы иитэргэ көмөлөһөллөр», — диэн Ил Дархан Айсен Николаев бэлиэтээтэ. Турниры Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлин аппараата, Россиятааҕы бойобуой снайпинг федерацията, «ВОИН» киин уонна СӨ Бырабыыталыстыбата тэрийдилэр. Мунньах түмүгүнэн 16–18 саастаах оҕолорго кыра хамаанданан турнир ыытарга эмиэ быһаарыы ылылынна. Регионнар үстүү киһилээх хамаандалары туруоруохтара. Күрэхтэһиилэр 22 LR кыра калибрдаах бинтиэпкэлэри туһанан ыытыллыахтара. Хаартыска: sakha.gov.ru