Кэбээйи уонна Өлөөн улуустарыгар ойуур баһаарын умуруорар бөлөхтөрү күүһүрдэр былааннаа... — 31 июля 2026 г. в 01:53:56.373
Кэбээйи уонна Өлөөн улуустарыгар ойуур баһаарын умуруорар бөлөхтөрү күүһүрдэр былааннаахтар Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Андрей Коноплев брифиҥҥэ иһитиннэрдэ. «Кэбээйи улууһун баһаардарыгар уонна Өлөөн улууһун Ээйик сэлиэнньэтин таһыгар баар баһаарыгар бөлөхтөрү күүһүрдэр боппуруос көрүллэр», — диэн кини бэлиэтээтэ. Өлөөн улууһугар муниципальнай таһымнаах ыксаллаах быһыы-майгы эрэһиимэ оннунан хаалар. Ээйик сэлиэнньэтин таһынааҕы ойуур баһаара суһал сулууспалар хонтуруолларыгар турар. Исписэлиистэр наадалаах баһаарынай дьаһаллары ыыталлар уонна уот тарҕанарын тохтотор үлэни салгыыллар. Ааспыт сууккаҕа өрөспүүбүлүкэҕэ 7 834,5 га уопсай иэннээх алта ойуур баһаара тохтотуллубут. Умайыылар Алдан, Үөһээ Халыма, Ньурба уонна Уус Маайа улуустарыгар умуруоруллубуттар. Суукка саҕаланыыта Саха сиригэр 190 930 га уопсай иэннээх 43 ойуур баһаара баара бэлиэтэнэр. Кэбээйи, Аллараа Халыма, Өлөөн уонна Орто Халыма улуустарыгар биэс улахан ойуур баһаарын умуруоруу салҕанар. Умуруорууга 245 киһи уонна 28 тиэхиньикэ тардылынна. От ыйын 10 күнүттэн өрөспүүбүлүкэҕэ ойуур баһаардарынан сибээстээн регионнааҕы таһымнаах ыксаллаах быһыы-майгы эрэһиимэ үлэлиир. Ону тэҥэ Саха сиригэр баһаартан сэрэтэр ураты эрэһиим олоххо киирэн турар. Хаартыска: Андрей Меженскай/«Якутия 24»