Горнайга «Уларыйыы» диэн киэҥ далааһыннаах социальнай бырайыак үлэлээтэ
Горнайга «Уларыйыы» диэн киэҥ далааһыннаах социальнай бырайыак үлэлээтэ Горнай улууһугар олох хаачыстыбатын тупсарар уонна нэһилиэнньэ доруобуйатын бөҕөргөтөр соруктаах кэскиллээх тэрээһиннэр ыытыллаллар. Бу күннэргэ өрөспүүбүлүкэтээҕи Гериатрическэй киин үрдүк квалификациялаах быраастара оробуочай сырыынан Горнай улууһугар тиийэн таһаарыылаахтык үлэлээтилэр. Горнай улууһугар Доруобуйа сылыгар уонна улууска доруобуйа харыстабылын 95 үбүлүөйдээх сылыгар анаммыт «Уларыйыы» (Преображение) диэн киэҥ далааһыннаах социальнай бырайыак үлэтин саҕалаабыта. Чөл олоҕу уонна дьиэ кэргэн сыаннастарын бөҕөргөтөр соруктаах ураты бырайыагы СӨ Доруобуйа харыстабылын министиэристибэтэ, бастыҥ медицинскай кииннэр уонна улуус дьаһалтата биир сыалга сомоҕолоһон сүрүннүүллэр. Бу күннэргэ өрөспүүбүлүкэтээҕи киин тутаах исписэлиистэрэ — клиническэй психолог уонна диетолог быраастара — кэлэннэр, бырайыак кыттыылаахтарын кытта истиҥ көрсүһүүнү тэрийдилэр. Кинилэр дьоҥҥо-сэргэҕэ сөптөөх ас туһунан дириҥ ис хоһоонноох иһитиннэриилэри оҥордулар, олохтоохторго туһалаах сүбэ-ама биэрдилэр. Өрөспүүбүлүкэтээҕи гериатрическэй киин быраастара улуустааҕы кырдьаҕастар уонна доруобуйаларынан хааччахтаах дьон олорор анал интернаттарыгар эмиэ сырытылар. Манна кинилэр кырдьаҕастары кытта атах тэпсэн олорон, истиҥник кэпсэттилэр. Мэйии үлэтин сайыннарыы уонна анал эрчиллиилэр көмөлөрүнэн эрдэ түөһэйииттэн (деменцияттан) харыстаныыга туһуламмыт боростуой, ол эрээри олус туһалаах ньымалары көрдөрөн, сырдатар үлэни ыыттылар. Дьон өй-санаа уонна эт-сиин өттүнэн чэгиэн буоларын ситиһэр маннык ураты социальнай бырайыактар олохтоох нэһилиэнньэ олоҕун уһатыыга уонна доруобуйа харыстабылыгар дьоһуннаах төһүү күүс буолаллар.