☀️☀️☀️☀️☀️☀️☀️☀️☀️☀️☀️ — 23 июня 2026 г. в 12:02:51.192
☀️☀️☀️☀️☀️☀️☀️☀️☀️☀️☀️ “Быһар быһах”, “Кылаан биилээҕи тургутуу”. Мэҥэ Хаҥалас улууһугар биир бастыҥ уонна түмсүүлээх “Мэҥэ тимир уустара” сал: СР норуотун маастара Леонид Говоров түмсүү кэлиҥҥи сылларга күүстээх хамсааһыннары таһаардылар. Түмсүү тэриллэригэр биир сүрүн олук буолбут саха быһаҕын кылаанын, сытыытын тургутар “Быһар быһах” күрэхпит сыллата ыытыллара үтүө үгэскэ кубулуйда. Быйылгы үрүҥ тунах ыһыахпытын сэргэхситэр, дьону умсугутар уус түһүлгэтигэр “Быһар быһах” уонна “Кылаан биилээҕи тургутуу” күрэхтэр олус сэргэхтик ыытылыннылар, күрэхтэри 1 Наахара С.И.Борисова аатынан сынньалаҥ киин салайааччыта, тимир ууһа Давид Трофимов уонна Мэҥэ Хаҥалас улууһун сатабыллаах маастара, үгүс күрэхтэр кыайыылаахтара Николай Костромин (Аллараа Бэстээх) иилээн – саҕалаан ыыттылар, сыллата күрэххэ кыттааччылар элбээн иһэллэр, быйылгы күрэххэ 18 саастаах эдэр уус Тимур Иванов кыттан илин – кэлин түсүһэн соһутта. Дьүүллүүр сүбэҕэ СР норуотун маастара Леонид Говоров, Мэҥэ Хаҥалас улууһун култуураҕа уонна духуобунай сайдыыга салалтатын үлэһитэ Василий Ядрихинскай, тимир ууһа Николай Сергеев үлэлээтилэр. Тыҥааһыннаах киирсии түмүгэр III миэстэ Радион Шарин, Суола Мэлдьэхси (20 000 солк), II Айаал Карамзин, Тумул ( 30 000 солк ) I Сергей Оконешников, Табаҕа (50 000солк ) кыайыылаах тахсаннар харчынан бириэмийэҕэ тигистилэр. “Быһар быһах” тимир устарын күрэҕэр харчынан бириэмийэлэри туруорбут «Саха концерт” агенство салайааччытыгар Василий Кривошапкинҥа уонна “Быһар Быһах” күрэхпит тэрийиитигэр сүүрбүт-көппүт, сүрүннээбит эдэр тимир ууһугар Николай Костроминҥа махталбытын биллэрэбит. “Кылаан биилээҕи тургутуу” (Заруба) биир ураты уонна сэргэх күрэххэ уустарбыт бэйэлэрэ бириис уксаннар тыҥааһыннаах киирсии кэннэ түргэн-тарҕан туттунуулаах Николай Костромин (Аллараа Бэстээх) кимҥэ да иннин биэрбэккэ Кылаан Кыайыылааҕынан таҕыста. Тимир уустарын, кыайыылаахтары Николай Васильев -АЙТАМЫЛ "Дархан Уус" ырыатынан эҕэрдэлээтэ.