Олоҥхо Дьиэтэ түһүлгэни төрүттээтэ. — 6 июля 2026 г. в 18:33:33.299
Олоҥхо Дьиэтэ түһүлгэни төрүттээтэ. Гавриил Колесов аатынан Олоҥхо Дьиэтэ сыллата Олоҥхо ыһыаҕа ыытыллар улуустарыгар тэрийии үлэтигэр күүс-көмө буолбута ыраатта. Быйыл Кэбээйи улууһун Арыктаах нэһилиэгин сынньалаҥ киинин кытары Олоҥхобут Дьиэтин коллектива фольклор түһүлгэтин төрүттээн үөрүүлээх арыллыытын тэрийдэ. Олоҥхо Дьиэтин алгысчыта Денис Оконешников бу үтүө түһүлгэҕэ үс күн устата ырыа-тойук ылланарын дойду иччилэрэ атыҥыраабатыннар-баалаабатыннар диэн сиэр-туом оҥорон алгыһы көтөхтө, кэлбит ыалдьыттары арыылаах алаадьынан, үрүҥ илгэнэн айах тутан маанылаатыбыт. Николай Иванович Степанов-Ноорой сиэнэ, олоҥхону толорооччу, Саха Өрөспүүбүлүкэтин култууратын туйгуна, Гавриил Колесов аатынан Мэҥэ Хаҥалас улууһун Олоҥхо Дьиэтин фольклорга уһуйааччыта Аксиния СТЕПАНОВА, хомус ууһа, Саха Өрөспүүбүлүкэтин үтүөлээх этээччитэ, алгысчыт, сиэри-туому тарҕатааччы Роман Иванов-Аар Аман Далан Уус, тойуксут, оһуохайдьыт Саха Өрөспүүбүлүкэтин үтүөлээх этээччитэ Татьяна Неустроева, Гавриил Колесов аатынан Мэҥэ Хаҥалас улууһун Олоҥхо Дьиэтин режиссера, Саха Өрөспүүбүлүкэтин култууратын туйгуна Ариан Пермяков уу сахалыы уус-уран айымньыларынан дьүһүйүү туруоран киэргэттилэр, Олоҥхо Дьиэтин салайааччыта Айта Васильева, тыас-уус, уот – күөс үлэһитэ Кай Эверстов иилээн-саҕалаан ыыттылар. Саха Өрөспүүбүлүкэтин Бырабыытылыстыбатын бэрэссэдээтэлин солбуйааччыта, Олоҥхо ыһыаҕын тэрийэр хамыһыйа бэрэссэдээтэлэ Сергей Местников, Саха Өрөспүүбүлүкэтин култуураҕа уонна духуобунай сайдыыга миниистирэ Афанасий Ноев, Саха Өрөспүүбүлүкэтин үөрэхтээһинин уонна наукатын миниистирин солбуйааччы Степан Степанов эҕэрдэ тыл эттилэр уонна Гавриил Колесов аатынан Олоҥхо Дьиэтин коллективыгар туора улуус диэбэккэ, ыраах сиртэн тэринэн, айаннаан кэлэн Олоҥхо Ыһыаҕын суолталаан, тэрээһини киэн далааһыннаан үтүө түһүлгэни төрүттээтигит диэн махтал тылларын эттилэр. Бу үтүө түһүлгэҕэ үс күн устата тойук, дэгэрэҥ ырыа, саха мааны мандар таҥаһын көрүү уонна тас дойду эпосоведтара кыттыылаах Аан дойду эпостара бырайыак, Аарктыкатааҕы эпос уонна ускуустуба киинин Олоҥхо Дьиэлэрин кытары сөбүлэҥ баттаһыыларын тэрээһиннэрэ ыытылыннылар.