Олоҥхо Дьиэлэрэ сөбүлэҥ түһэристилэр, сиэр-туом көрдөрдүлэр. — 6 июля 2026 г. в 18:37:01.619
Олоҥхо Дьиэлэрэ сөбүлэҥ түһэристилэр, сиэр-туом көрдөрдүлэр. От ыйын 5 күнүгэр Кэрэ Кэбээйи сиригэр, “Үс өрүс тардыылаах, уу чалгый куттаах Кэбээйигэ-Саха Сирин тэбэр сүрэҕэр!” Өрөспүүбүлүкэтээҕи Олоҥхо Ыһыаҕар, дьоһун мааны түһүлгэҕэ Олоҥхо Дьиэлэрин биир ситимин салайар Арктикатааҕы эпостар уонна ускуустуба киинэ уонна Сахабыт Сиригэр айымньылаахтык, киэҥ далааһыннаахтык үлэлии турар Олоҥхо Дьиэлэрэ сөбүлэҥ түһэристилэр. Амма улууһун Эмис нэһилиэгэ тыа сирин түөлбэтин Екатерина Захарова – Саха Күөрэгэйин аатынан култуура киинин салайааччыта Анжелика Александровна ИВАНОВА, Бүлүү улууһун Василий Осипович Каратаев аатынан култуурунай-этнографическай Олоҥхо Дьиэтин, оройуоннааҕы норуот айымньытын уонна култуурунай сайдыытын киинин салайааччыта АленаАлександровна ДАШЕВСКАЯ, Үөһээ Бүлүү улууһун Олоҥхо норуот айымньытын дьиэтин салайааччыта Изабелла Петровна САВВИНОВА, Горнай улууһун Семен уонна Софрон Даниловтар ааттарынан духуобунас киинин салайааччыта Александра Владимировна АЛЕКСЕЕВА, Кэбээйи улууһун Нидьили тыа сирин түөлбэтин Андрей Саввич Борисов аатынан “Тускул” култуурунай сайдыы киинин салайааччыта Владислав Саввич ЕГОРОВ., Мэҥэ Хаҥалас улууһун Гавриил Гаврильевич Колесов аатынан оройуоннааҕы норуот айымньытын киинэ Олоҥхо Дьиэтин салайааччыта Айта Семеновна ВАСИЛЬЕВА, Нам улууһун Ленскэй нэһилиэгэ тыа сирин түөлбэтин Прокопий Прокопьевич Ядрихинскай-Бэдьээлэ аатынан Олоҥхо Дьиэтэ духуобунай сайдыыга уонна уус-уран айымньытын киинин салайааччыта Вера Васильевна КОЛПАШНИКОВА, Ньурба улууһун култуура департаменын иһинэн үлэлиир Олоҥхо Дьиэтин салайааччыта Розалия Михайловна ТИХОНОВА, Сунтаар улууһун Сергей Афанасьевич Зверев - Кыыл уолун аатынан улуустааҕы норуот айымньытын киинин салайааччыта Алексей Дмитриевич СЕДАЛИЩЕВ, Уус Алдан улууһун Василий Васильевич Никифоров – Күлүмнүүр аатынан “Тойон Мүрү” култуура дыбарыаһын иһинэн үлэлиир “Олоҥхо Дьиэтэ” этнокультурнай киин салайааччыта Айаал Гаврильевич АРГУНОВ Саха Өрөспүүбүлүкэтин судаарыстыбаннай сүбэһитэ, Арктикатааҕы эпостар уонна ускуустуба киинин салайааччыта Андрей Саввич БОРИСОВТЫЫН бииргэ айымньылаахтык үлэлииргэ Кэбээйи сиригэр-уотугар сөбүлэҥ түһэрсэн илии баттастылар. Бу кэннэ Олоҥхо Дьиэлэрэ сахалыы төрүт сиэри-туому бар дьон иннитигэр сөргүтэн көрдөрдүлэр, оҕо төрөөһүнэ, окко киирии, кырдьаҕаһы бултааһын, кымыс туруоруу, салама ыйааһын курдук умнулла быһыытыйбыт сиэри-туому дьоҥҥо сырдаппыттара кэрэхсэбиллээх. Гавриил Колесов аатынан Олоҥхо дьиэтэ Мэҥэ Хаҥалас улууһуттан төрүттээх Саха Өрөспүүбүлүкэтин норуотун маастара удьуор иистэнньэҥ Анисия Федорова-Ааниисийэ XVII-XVIII үйэлэрдээҕи сөргүтэн тикпит сүктэр кыыс уонна күтүөт уол таҥастарынан “Сүктэр кыыһы таҥыннарыы” сиэрин-туомун көрдөрөн дьону сөхтөрдүбүт, бу сиэри-туому Аксиния Степанова “Сүктэр кыыс” тойугун толорон, Роман Иванов – Аар Аман Далан Уус кырыымпатын тыаһынан доҕуһуоллаан киэргэттилэр.