Аан Дойду эпостарын толорооччулар түһүлгэлэрэ. — 6 июля 2026 г. в 18:35:08.112
Аан Дойду эпостарын толорооччулар түһүлгэлэрэ. Быйылгы Олоҥхо ыһыаҕар Сахабыт Сирин олоҥхону толорооччулара эрэ буолбакка түүр төрүттээх, аймахтыы норуоттар өрөспүүбүлүкэлэриттэн: Тыва, Алтай, Башкирия, Хакасия, Казахстан, Кыргызстан сирдэриттэн ааттаах – суоллаах эпос чинчийээччилэрэ, толорооччулара кэлэн кыттыыны ыллылар. Мэҥэ Хаҥалас улууһугар 2013 сыллаахха Олоҥхо ыһыаҕар кыттыыны ылбыт Тыва эпосоведа Кунгаа Маргарита Базыр-ооловна Мэҥэ Хаҥаластар буоларбытын билэн олус үөрдэ, Майаҕа “Ураһалаах” алааһыгар ыытыллыбыт Олоҥхо Ыһыаҕа олоҕор биир ураты чаҕылхай үтүө өйдөбүлгэ хаалар тэрээһинэ буоларын үөрэ-долгуйа кэпсээтэ. 2021 сыллаахха Майаҕа Олоҥхо Дьиэтэ тэрийэн ыыппыт “НеоОлонхо” бэстибээлбитигэр ыалдьыттаабыт Башкирия эдэркээн эпос толорооччута Мираз Узянбаев тиийэн кэлэн үөртэ, ахсынньы аам-даам тымныытыгар туман быыһынан сылдьыбытым, билигин күөх сайга көччүйэ сылдьабын уонна олохпор бастакыбыт үрүҥ түүн диэни көрөн сөхтүм диэн сэһэргиир. 2024 сыллахха Казахстан Алматы куоратыгар Сахабыт Сирин күннэрин тэрийии чэрчитинэн эпостар бэстибээллэрин тэрийсибит, Гавриил Колесов аатынвн Олоҥхо Дьиэтэ тэрийбит “Эпосы мира” бэстибээлбитигэр дьүүллүүр сүбэ бэрэссэдээтэлигэн үлэлээбит Аль Фараби Казахстан университетын профессора, эпосовед Булдыбай Анарбай Саиуглы Олоҥхо ыһыаҕар аан бастакытын ыалдьыттаата. Араас дойдуларга бииргэ алтыспыт, үлэлэспит Кыргызстан биллиилээх фольклориһа, маносовед Талантаалы Бакчиев Олоҥхо ыһыаҕар бастакытын сырытта, бу курдук тас дойдулартан тиийэн кэлбит биир эйгэлээх, үтүө дьоммутун, доҕотторбутун көрсөн сүргэбит көтөҕүлүннэ. Мэҥэ Хаҥалас улууһун олоҥхону толорооччулара Аксиния Степанова, Станислав Иванов араас дойду ааттаахтарын кытта атах тэпсэн олорон сэттэ араас омук тылынан Былатыан Ойуунускай “Ньургун Боотур” олоҥхотун толорбуттара дьон сэргэ кэрэхсээтэ. Бу дьоһун тэрээһиҥҥэ Саха Өрөспүүбүлүкэтин Ил Түмэн Судаарыстыбаннай мунньаҕы бэрэссэдээтэлин бастакы солбуйааччыта, Олоҥхо национальнай кэмитиэтин бэрэссэдээтэлэ Александр Жирков эпос тула айымньылаах үлэм биир улахан кыайыыта, Ньургун Боотур Олоҥхо тоҕус араас тылга тылбаастаммыта буолар диэн иһитиннэрдэ.