🎭👦🏻👧🏻 Саха театрыгар эдэр көрөөччүлэргэ аналлаах экскурсиялар — 7 июня 2026 г. в 11:47:23.744
🎭👦🏻👧🏻 Саха театрыгар эдэр көрөөччүлэргэ аналлаах экскурсиялар Бу күннэргэ Былатыан Ойуунускай аатынан Саха театра бэйэтин дьиктилээх дойдутун аартыгын эдэр ыччакка киэҥник аста. Араас оскуолалар үөрэнээччилэрэ, ол иһигэр Айыы Кыһатын оҕолоро, ону таһынан "Берегиня" социальнай-реабилитационнай киин иитиллээччилэрэ театр арахсыбат ыалдьыттара буоллулар. Кинилэр дьиктилээх эйгэҕэ умса түһэн, искусствоны чугастык билсистилэр. Экскурсия кэмигэр оҕолор театр устуоруйатын, сыана кэннинээҕи олох кистэлэҥнэрин биллилэр. Артыыстар гриммернай хосторун, костюмернайдары, декорациялар оҥоһуллар уонна харалла сытар сирдэрин көрөн сөхтүлэр. Сыана дьиктилээх эйгэтэ хайдах үөскүүрүн, сырдатыы уонна музыка уратылара туохханый диэн ыйытыыларга толору хоруй ыллылар. Санаттахха, ааспыт нэдиэлэҕэ Саха театрын артыыстара «Берегиня» киин оҕолоругар анаан сылаас көрсүһүүлэри ыытан, бэлэхтэри туттаран, маастар-кылаастары көрдөрбүттэрэ. Бу тэрээһиннэр оҕолор сүрэхтэригэр сылаас сыһыаны, искусствоҕа тапталы үөскэтэр, култуура эйгэтигэр чугаһатар биир суол буолар. Саха театра үүнэр көлүөнэни иитиигэ, кинилэргэ искусство эйгэтин арыйыыга үтүө үлэтин салгыыр. Бу курдук тэрээһиннэр оҕолорго театр уонна искусство суолтатын өйдөтөллөр, кэлэр олохторугар умнуллубат өйдөбүллэри хааллараллар, Саха сирин култууратын сайдыытыгар бэйэлэрин кылааттарын киллэрэллэригэр көҕүлүүллэр.