🌳Чурапчы нэһилиэгэр, уопсайынан улуус үрдүнэн олорор сирдэринэн ырааһырдыы үлэтэ, күөх... — 15 июня 2026 г. в 08:19:12.773
🌳Чурапчы нэһилиэгэр, уопсайынан улуус үрдүнэн олорор сирдэринэн ырааһырдыы үлэтэ, күөх үүнээйини, оҕуруот аһын үүннэрии аан бастаан 1972 сылтан саҕаламмыт. Ол саҕана улууска дьахтар Сэбиэтэ саҥа састаабынан талыллан көҕөрдүүгэ үлэни саҕалаабыт, бэрэссэдээтэлинэн доруобуйа харыстабылын туйгуна Варвара Дмитриевна Васильева талыллыбыт.Тэрилтэлэр тастарыгар сүүһүнэн хатыҥ, харыйа мас олордуллубут. Оҕурсуну, помидору, моркуобу, луугу маассабайдык олордуу саҕаламмыт. Варвара Дмитриевна бэйэтин холобурунан дьиэтин таһыгар бузина, черемуха, акация, элбэх сыллаах сибэккилэри, оҕуруот астарын олоппут. Ол саҕана барыта саҥа буола, бу дьаһалларга оройуон кылаабынай агронома Василий Федотович Ермолаев активнай кыттыыны ылбыт, кини олохтоохторго элбэх семинардары ыытан сүбэ-ама буолбут. Чурапчыттан төрүттээх ученай Семен Попов оҕуруот астарын сиэмэлэрин тарҕатан, хайдах олордоллорун сүбэлээн улахан көме буолбут. Олохтоохтортон Клара Поливкина, Апполинария Головина сүбэ-ама буолбуттар. 🌱Аан дойду үрдүнэн ыытылла турар «Сад памяти-2026» диэн акцияҕа мас олордуутугар Чурапчы нэҺилиэгин тэрилтэлэрэ ис сүрэхтэриттэн кытыннылар, акция ыам ыйын 28 күнүттэн бэс ыйын 5 күнүгэр диэри ыытылынна. Ленин болуоссата, Кыайыы сквера, Аҕа дойду сэриитигэр сэрии толоонугар өлбүт биир дойдулаах буойттарбытыгар анаммыт памятникка, 50 лет Октябрьской революции, Дьокуускай куорат скверигэр, Д.П.Лазарев памятнигар, Г.Д.Ефимов скверигэр, киин уулуссалар палисадниктарыгар, ТОС тар сквердэригэр, тэрилтэлэр, биирдиилээн ыаллар территорияларыгар барыта 891 араас мастары олоттулар. Ол курдук, 492 хатыҥ, 193 талах, 56 харыйа, 53 бузина, 50 бэс, 21 черемуха, 19 боярышник, 6 акация, 1 малина олордо. 🌲Мас олордуллан, сотору кэминэн хойуутук, өлгөмнүк үүнэн тэнийиэ. Үтүө уонна наадалаах акцияҕа кыттыы нэһилиэкпит экологическай туруга бөҕөргүүрүгэр олук буолар. Сылга иккитэ ыытыллар көҕөрдүү акцияларыгар тус кылааттарын киллэрбит бары тэрилтэлэрбитит үлэһиттэригэр, общественниктарга, олохтоохторго махталбытын тириэрдэбит. Төрөөбүт дойдубут айылҕата чэчирии турдун! «Чурапчы нэһилиэгэ» ТСТ дьаһалтата 15.06.2026 сыл.