*Сунтаар улууһугар өрөспүүбүлүкэтээҕи Үрүҥ Тунах Ыһыах үрдүк таһымҥа арылынна* — 20 июня 2026 г. в 04:47:34.414
*Сунтаар улууһугар өрөспүүбүлүкэтээҕи Үрүҥ Тунах Ыһыах үрдүк таһымҥа арылынна* 🌿🌿🌿Сунтаар улууһа төрүттэммитэ 225 сылыгар аналлаах өрөспүүбүлүкэтээҕи Үрүҥ Тунах Ыһыах ыраахтан-чугастан ыалдьыттары ыҥыран, үрдүк сиэр-туом, үтүө үгэс тутуһуллан өрө көтөҕүллүүлээхтик арылынна. Добун түһүлгэҕэ улуус Аҕа баһылыга Анатолий Григорьев ытык дуоҕаны уруйдуу өрө анньан, мустубут бар дьонун үрүҥ тунах ыһыаҕынан итиитик-истиҥник эҕэрдэлээтэ. Правительство дьаһалтатын салайааччыта Георгий Михайлов туруу үлэһит дьоммутугар үрдүк таһымнаах наҕараадалары туттарда. Ыһыах сиэрин-туомун алгысчыт Михаил Евсеев - Кураһаай Мэхээлэ салайан ыытта. Кини тоҕус туруйа уолаттар уонна аҕыс кыталык кыргыттар арыалдьыттаах, Үрдүк Айыылартан саха дьонугар уйгуну-быйаҥы, дьолу уонна этэҥҥэ буолууну көрдөһөн, сири-дойдуну арчылаата. Ол кэннэ 700-чэ кэриҥэ киһи кыттыылаах уус-уран дьүһүйүү саҕаланна. Быйылгы туруоруу Сунтаар улууһа хайдах төрүттэммитин сиһилии билиһиннэрэр сыаллаах айыллан тахсан, дьон биһирэбилин ылла. Бу уустук уонна дириҥ ис хоһоонноох сценарийы Саха сирин норуотун суруйааччыта Наталья Михалева - Сайа суруйда, оттон сүрүн режиссерынан Оҕо искусствотын оскуолатын салайааччыта Алексей Степанов үлэлээтэ. Ыһыах арыллыытыгар кэрэ көстүүнү бэлэхтээбит бар дьоммутугар, үҥкүүһүт оҕолорбутугар барҕа махталбытын этэбит. _Сунтаар улууһун дьаһалтатын пресс-сулууспата_