*Ытык сиргэ сүгүрүйүү: Айыы аартыгын арыйар үрүҥ тунах ыһыах* — 20 июня 2026 г. в 02:01:00.118
*Ытык сиргэ сүгүрүйүү: Айыы аартыгын арыйар үрүҥ тунах ыһыах* 🌿🌿🌿Сунтаар ыһыахтыыр сирэ айылҕа бэйэтэ анаан-минээн айбытын курдук кэрэ, тупсаҕай уонна киэҥ-куоҥ хонуулаах. Түһүлгэҕэ киирбит ыалдьыттар уонна олохтоохтор, бастатан туран, былыргы үгэһи тутуһан, сири-дойдуну аһаталлар, ытык маска сүгүрүйэллэр. Аар мас — сир-дойду ситимэ. Кини атыттартан баараҕай, киппэ көстүүтүнэн, силиһэ-мутуга бөдөҥүнэн уонна улуутунан биллэ уратылаах. Өбүгэлэрбит маннык аар мастарга сир-дойду иччитэ Аан Алахчын хотун бэйэтинэн олохсуйан олорор диэн чиҥник итэҕэйэллэрэ. Кинилэр ытык сиргэ сүгүрүйэн, ис дууһаларыттан көрдөһөн-ааттаһан, өйдөрүн-санааларын сааһылыыллара, араас ыарыыттан-дьайтан эмтэнэн, саҥа күүһү ылаллара. Бу да сырыыга кэлбит ыалдьыттар үтүө үгэһи тутуһан, кэрэх маска сүгүрүйэн, алгыс ылан, кэһии оҕотун уурдулар, ситии быаҕа саламаны баайдылар. Бу сиргэ этиллибит үтүө тыллар, баҕа санаалар хайаан да туолаллар диэн итэҕэл күүстээх. _Сунтаар улууһун дьаһалтатын пресс-сулууспата_