*Биир дойдулаахпыт Альберт Иванов анал байыаннай дьайыы кэккэтигэр киирэн хорсуннук сул... — 6 августа 2026 г. в 10:43:06.788
*Биир дойдулаахпыт Альберт Иванов анал байыаннай дьайыы кэккэтигэр киирэн хорсуннук сулууспалыыр* 🪖📦 Сунтаар улууһун олоҕор, сайдыытыгар бэйэтин ураты суолун-ииһин хаалларбыт, улуус баһылыгын социальнай боппуруостарга уонна имиджевай политикаҕа солбуйааччынан таһаарыылаахтык үлэлии сылдьыбыт Альберт Ионович Иванов Дойду көмүскэлигэр турунан, хорсуннук сулууспалыы сылдьар. Күн бүгүн кинини дойдутун дьоно, улуус делегацията көрүстэ уонна биир дойдулаахтарын ааттарыттан хомуллубут гуманитарнай көмөнү туттарда. Альберт Иванов бу быһаарыныыны ылла да оҥорботоҕо. Кини анал байыаннай дьайыы саҕаланыаҕыттан туора турбакка, волонтер быһыытынан көмө тирэх пуунугар үлэлээбитэ. Волонтердуур кэмигэр улуус гуманитарнай миссияларын салайсан, дьайыы буола турар сирдэригэр бэйэтинэн хаста да тиийэ сылдьыбыта. Фронт кутталлаах усулуобуйатын, байыастар олохторун-дьаһахтарын ис иһиттэн билбит буолан, кини уолаттары кытта биир кэккэҕэ туруохтаахпын диэн бигэ санааҕа кэлбитэ. Бу ураты патриотическай өрө көтөҕүллүү уонна хорсун санаа, кинини сулууспа кэккэтигэр аҕалбыта. Улуус делегациятын кытта көрсүһүү олус иһирэх уонна долгутуулаах быһыыга-майгыга ааста. Альберт Ионович дойдутун сонуннарын истэн, улууһун дьонугар сылаас махталын тиэрдэн, байыаннай дуоһунаһыгар бэриниилээхтик сулууспалыырын биллэрдэ. Сунтаар дьоно-сэргэтэ бэйэлэрин киэн туттар киһилэригэр, хорсун буойуннарыгар өрүү тирэх буолалларын уонна кыайыылаах эргиллэрин күүтэллэрин эттилэр. Биир дойдулаахпытыгар, хорсун байыаска чэпчэки сулууспаны, кытаанах доруобуйаны уонна этэҥҥэ буолууну баҕарабыт. Дойдуҥ дьонун алгыһа өрүү араҥаччылыы турдун! _Сунтаар улууһун дьаһалтатын пресс-сулууспата_