*Сунтаардар РФ Судаарыстыбаннай Дууматын дьокутаатыгар хандьыдаат Петр Шамаевы өйүүллэр...
*Сунтаардар РФ Судаарыстыбаннай Дууматын дьокутаатыгар хандьыдаат Петр Шамаевы өйүүллэрин биллэрдилэр* 🔹️🔹️🔹️Саха сиринээҕи биир мандааттаах уокурукка РФ Судаарыстыбаннай Дууматын дьокутаатыгар хандьыдаат Петр Шамаев Сунтаар сиригэр кэлэрин олохтоохтор олус күүппүттэрэ. Кини республика ыччатын түмэ тарпыт, бу эйгэҕэ улахан хардыыны оҥорбут ыччат миниистирэ, «Боотур» этэрээт хамаандатыгар киирэн, уустук балаһыанньаны этинэн-хаанынан билбит анал байыаннай дьайыы бэтэрээнэ буолар. Хорсун байыас кыргыһыы хонуутугар дрон операторынан, дрон-камикадзенан уонна ордук табыллан артиллерия сэриилэрин корректировщигынан сулууспалаабыта. Хомойуох иһин, уустук усулуобуйаҕа аҥаар атаҕын сүтэрэн, дойдутугар эргиллибитэ. Ол эрээри санаатын түһэрбэккэ, билигин дойду сайдыытыгар улахан программаны оҥостон, Госдума депутатыгар бэйэтин кыаҕын боруобалыыр. Улуус дьонун кытта көрсүһүү бэрт истиҥ, аһаҕас уонна ирэ-хоро кэпсэтии тыыннаах ааста. Дьон-сэргэ кыһалҕалаах боппуруостары хамаҕатык туруорда. Олохтоохтор эдэр, кэскиллээх бэлиитик тылын-өһүн олус сэргээтилэр, инники үлэлиэхтээх хайысхатын биһирээтилэр уонна кинини 100% өйүүллэрин биллэрдилэр. Маны тэҥэ, Петр Шамаев байыаннай дьайыыга сылдьар байыастар дьиэ кэргэттэрин кытта анал көрсүһүүнү оҥордо. Кинилэр уустук боппуруостарын, кыһалҕаларын истэн, хайаан да быһаарарга күүскэ үлэлэһиэх буолла. Кини билигин чуолаан сураҕа суох сүппүт байыастары булууга уонна кинилэри дойдуларыгар харайыыга күүскэ үлэлии сылдьар. ПЕТР ШАМАЕВ: _«Ыччат миигин өрө таһаарбыта, миниистир оҥорбута. Оттон 21 эрэ саастаах эдэркээн байыас сэрии хонуутуттан тыыннаах таһаарбыта. Ол курдук мин олоҕум ыччаты кытта ыкса ситимнээх. Ыччаты кытта үлэлиирбин сөбүлүүбүн, билиҥҥи оҕолор сайдыылара, таһымнара олус үрдүк»._ _«Оҕо эрдэхпиттэн булка сыстан, инники олохпун айылҕаны кытта ситимниэхпин баҕарар этим. Ол иһин да БГФ экологическай хайысхатын баһылаабытым. Билигин тыа сирин сайыннарыыга үлэлиэхпин баҕарабын. Тыа сирэ сайыннаҕына биһиги дойдубут кыаҕырыа, ыччаппыт үрдүккэ тахсыа. Маннык уустук кэмҥэ биир сомоҕо буолуохха!»_ Сунтаардар эдэр, хорсун уонна эрчимнээх хандьыдаат Петр Шамаев инникитин дойду таһымыгар Саха сирин интэриэһин чиэстээхтик көмүскүө диэн эрэнэллэр уонна күүстээх өйөбүлү уокурукка улахан кыайыыны ситиһэригэр баҕа санааларын эттилэр. _Сунтаар улууһун дьаһалтатын пресс-сулууспата_