*Үбүлүөйдээх сылга — саҥардыллыбыт архыып*
*Үбүлүөйдээх сылга — саҥардыллыбыт архыып* Улуус архыыба — бу олохтоох история үйэлээх кэрэһитэ, ааспыт кэм чахчылара хараллан сытар саамай сүрүн тэрилтэтэ буолар. Манна күн аайы араас ыйытыктаах, сороҕор кыһалҕалаах, пенсияҕа тахсааччы, бэйэлэрин төрүттэрин (төрүччүлэрин) билээри сыал-сорук оҥостон кэлэр дьон ахсаана элбэх. Архыып сылаас хоһугар олорон, хараллан сыппыт тустаах дөкүмүөннэрин хасыһан булан, үөрэн-көтөн, дуоһуйан барар дьон үгүс буолара үөрдэр. Дьон-сэргэ маннык табыллан үлэлииригэр тэрилтэ усулуобуйата улахан оруоллаах. Манан сиэттэрэн, быйыл Сунтаарбыт улууһа сурукка-бичиккэ киирбитэ 225 сылыгар уонна улуус архыыба төрүттэммитэ 90 сыллаах үбүлүөйдэригэр сөп түбэһэн, архыып тэрилтэтигэр улахан суолталаах тупсарыы үлэтэ ыытылынна. Төһө даҕаны үп-харчы өттүнэн уустук, кырыымчык кэмигэр, спонсор көмөтүнэн уонна бэйэ күүһүн түмэн архыып хоһугар өрөмүөн үлэтэ барда. Ол түмүгэр дьиэ ис бараана олус тупсан, сырдаан үлэһиттэргэ да, нэһилиэнньэ да сылдьарыгар олус бэрт усулуобуйа олохтонно. Улахан үлэ олоххо киирэригэр Дьокуускайдааҕы ООО „Центр Кровли“ тэрилтэ салайааччыта, биир дойдулаахпыт, Маар Күөл нэһилиэгин уонна Сунтаар улууһун бочуоттаах олохтооҕо, СӨ „Бочуоттаах тутааччыта“ Владимир Емельянов үбүлээн улахан көмөнү уунна. Кини бэйэтин суотугар тутуу матырыйаалларын атыылаһан ылан биэрдэ уонна подряднай тэрилтэ үлэһиттэрин хамнаһын уйунна. Үлэ барарыгар Дьокуускайтан тутуу матырыйаалын түргэн-тарҕан кэминэн “Центр Кровли” тэрилтэ үлэһитэ Алексей Тимофеев ылан ыытта. Өрөмүөн подряднай үлэлэрин Самвел Саакян салайда. Ону тэҥэ, бэлэм матырыйаалынан бэйэ күүһүнэн өрөмүөн сорох үлэлэрэ эмиэ ситиһиилээхтик толорулуннулар. Бу бэйэ күүһүнэн ыытыллыбыт тутуу үлэлэригэр Николай Иванов, Степан Егоров уонна Василий Николаев күүс-көмө буоллулар. Маны сэргэ, улууспут дьаһалтата, өрөмүөн үлэтэ саҕаланыаҕыттан, туох уонна хайдах көмө наадатынан көрөн, тустаах өйөбүлү оҥордо. Онон түмсүүлээхтик саба түһэн, үлэ дөбөҥнүк табыллан түмүктэннэ. Улууһун сайдыытыгар, төрөөбүт дойдутун туһугар кыһаллар, үтүө санаалаах биир дойдулаахпытыгар, Владимир Емельяновка, улуус тутуутугар уонна историятын харыстааһыныгар киллэрбит улахан кылаатын, күүс-көмө буолбут үтүө дьыалатын иһин барҕа махтал буоллун! Кини үлэтигэр уонна «Центр Кровли» тэрилтэтигэр өссө үрдүк ситиһиилэри, таһаарыылаах үлэни баҕарабыт. Ону тэҥэ, улууспут дьаһалтатыгар, өрөмүөн үлэлэрин бэриниилээхтик уонна хаачыстыбалаахтык ыыппыт подрятчикка уонна бэйэ күүһүнэн көмөлөспүт үтүө санаалаах дьоммутугар муҥура суох махталы биллэрэбит. Күүстээх үлэҕит уонна көмөҕүт иһин эһиэхэ уонна эһиги дьиэ кэргэттэргитигэр кытаанах доруобуйаны, дьолу-соргуну уонна ситиһиини баҕарабыт. Дьоһун үтүө дьыалаҕыт бэйэҕитигэр үс төгүл үрдээн үөрүүнэн эргийдин! АЛЕНА ИВАНОВА, Сунтаар улуһун архыыбын кылаабынай исписэлииһэ