СУНТААРГА САХА ТӨРҮТ ЫСТАНЫЫТЫН КҮРЭҺЭ ТЭРИЛИННЭ
СУНТААРГА САХА ТӨРҮТ ЫСТАНЫЫТЫН КҮРЭҺЭ ТЭРИЛИННЭ Сунтаарга сүүрүк, саха тɵрүт ыстаныытын ааттаах тириэньэрэ Анатолий Павлович Осипов сырдык кэриэһигэр саха тɵрүт ыстаныы аһаҕас күрэһэ тэрилиннэ. Анатолий Павлович Осипов - сүүрүүгэ, саха тɵрүт ыстаныытыгар тириэньэринэн үлэлии сылдьан таһаарбыт оҕолоро олус элбэхтэр. Онтон сорохторо Саха сирин спордун сайдыытыгар күүскэ үлэлэһэллэр. 2004 сыллаахха "Азия оҕолоро" күрэһигэр үс оҕото бириистээх миэстэлэргэ тиксибит кытта түгэннээх. Сунтаар улууһун Бочуоттаах олохтооҕун, бастыҥ тириэньэр Анатолий Осипов аатын үйэтитэн быйыл иккис тɵгүлүн саха тɵрүт ыстаныытыгар аһаҕас күрэс тэрилиннэ. Манна кинини кытта алтыспыт спортсменнар, тириэньэрдэр иитиллээччилэрин илдьэ кэлбиттэр. Уйусхан Егоров - эдэр тириэньэр Сунтаардааҕы оҕо спортивнай оскуолатыгар үлэлиир. Кини бу кɵрүҥҥэ элбэх оҕону уһуйар, угуйар. Быйыл Уустуйаҕа сайыҥҥы лааҕыр тэрийэн бүтүн россиятааҕы күрэскэ "Бастыҥ сайыҥҥы лааҕыр" күрэһин кыайыылааҕа буолбута. Бу тэриллибит күрэскэ 88 оҕо кытынна. Кыайыылаахтарга, биһирэбил миэстэлэргэ 270 тыһ.солк. бириис пуондата аймахтар, биир идэлээхтэр, доҕоттор кɵмɵлɵрүнэн турда. Күрэс кɵмɵтүнэн саха тɵрүт ыстаныытын иитиллээччилэрэ олус сайдаллар. Анатолий Павлович аатын үйэтитэн ɵссɵ 2024 сыллаахха Томуһукаан түɵлбэтигэр уулусса ааттаммыта кэрэхсэнэр. Тускулаана Горохова-Кобельянова