Ытыктабыллаах Сунтаар улууһун олохтоохторо!
Ытыктабыллаах Сунтаар улууһун олохтоохторо! Барыгытын олус эппиэтинэстээх үс күннээх Государственнай Дума быыбара түмүктэммитинэн эҕэрдэлиибин. Бастатан туран, бу судаарыстыбаннай суолталаах улахан быыбарга гражданскай позицияҕытын биллэрэн, куоластааһыҥҥа көхтөөхтүк кыттыбыт улууһум дьонугар бука барыгытыгар махтал буоллун! Бу үс күн устата быыбар сокуонун куруубайдык кэһии түбэлтэтэ тахсыбата диэн бэлиэтиир тоҕоостоох. Онон сиэттэрэн быыбар тэрээһинигэр эппиэтинэстээхтик, чопчутук үлэлээбит территориальнай быыбардыыр хамыыһыйа үлэһиттэригэр, кэтээн көрөөччүлэргэ махталбын этэбин. Улуустааҕы территориальнай быыбардыыр хамыыһыйа иһитиннэрбитинэн, улуус үрдүнэн быыбарга куоластааччы уопсай ахсааныттан 57,8%-на кытынна. Куоластаабыт дьон 47,84 %-на «Биир Ньыгыл Россия» партияны өйөөтө. Бу – үчүгэй көрдөрүү. Быыбар түмүгэр сыһыаннаан эттэххэ, дойду балаһыанньатын сөпкө өйдөөн, «Биир Ньыгыл Россия» партияны уонна Петр Шамаев кандидатуратын өйөөбүт, куоластаабыт дьоҥҥо тус бэйэм уонна «Биир Ньыгыл Арассыыйа» Сунтаардааҕы салаатын аатыттан дириҥ махталбын тириэрдэбин. Партия бу быыбарга кыайыыны ситиһиитэ дойдубут тутуспут суолуттан туораабакка, салгыы сайдарын мэктиэтэ буолар. Бу күннэргэ Россия норуота түмсүүлээҕин, уустук кэмҥэ сомоҕолоһор күүстээҕин көрдөрдө. «Биир Ньыгыл Россия» политическай партия быыбардааччыларын итэҕэлин толоруо, дойдубут олоҕо тупсарыгар, эйэлээх олох кэлэригэр салгыы күүскэ үлэлиэ диэн быһаччы эрэнэбин. Биир мандааттаахха Госдуума быыбарын историятыгар Саха сириттэн «Биир Ньыгыл Россия» кандидата кыайбыта диэн бу иннинэ суоҕа. Петр Шамаев партияттан бастакынан кыайыыны ситистэ. Бу сахатын дьоно киниэхэ эрэнэллэрин, депутат быһыытынан үлэлиэ диэн күүскэ итэҕэйэллэрин көрдөрөр. Сунтаар улууһун дьоно-сэргэтэ киниэхэ 45,57% куоластаата. Сунтаар улууһун олохтоохторо, быыбарга көхтөөх кыттыыгыт, өйөбүлгүт, итэҕэлгит иһин өссө төгүл махтанабын, чэгиэн туругу, этэҥҥэ олоҕу баҕарабын. Анатолий Григорьев, Сунтаар улууһун баһылыга