*Сунтаарга аан бастакытын сылаас муосталаах аныгы хотон тутуллар*
*Сунтаарга аан бастакытын сылаас муосталаах аныгы хотон тутуллар* 🔹️🔹️🔹️Сунтаар улууһун Тойбохой нэһилиэгэр тыа хаһаайыстыбатыгар улахан суолталаах уонна сонун эбийиэк тутуута күүскэ бара турар. Манна кыра кыамталаах эбийиэктэри тутуу уонна өрөмүөннээһин программанан 70 миэстэлээх саҥа хотон үлэҕэ киирэр күнэ чугаһаата. Бу хотон сүрүн уратытынан уонна улууска маҥнайгынан сылаас муосталаах буолуоҕа. Билигин тутааччылар систиэмэтин номнуо тардан, үрдүнэн бетон бүрүөһүнүн куппуттар. Тутуу хаамыытын Сунтаар улууһун баһылыга Анатолий Григорьев уонна тыа хаһаайыстыбатын управлениетын салайааччыта Владимир Анисимов көрдүлэр. Тутууну ааспыт сылтан тэриллэн үлэлиир, эдэр дьон күүһүн холбообут «Тойкоп» кооператив иилээн-саҕалаан ыытар. Билигин кинилэр нэһилиэнньэ дьонуттан хомуйан, барыта 52 төбө сүөһүнү көрөн-истэн олороллор. Быйыл угут дьыл туран, от сезона уһаабытынан, тутуу үлэтигэр арыый хойутаан киирдилэр. Ол үрдүнэн, эдэр кэлэктиип туох баар күүһүн ууран, эбийиэги кэлэр ый бүтүүтэ түмүктээн үлэҕэ киллэрэр былааннаах. Тутууга барыта 5 мөл. солк. үп көрүллүбүт. Бу үбүнэн матырыйаалларын атыыласпыт буоллахтарына, кооператив бэйэ күүһүнэн тутан таһаарар. Бу курдук аныгы технологияны туһанан, үлэни чэпчэтии тыа сиригэр эдэр дьону тардыыга уонна сылгы-сүөһү ахсаанын элбэтиигэ улахан тирэҕинэн буолар. ✍️ Сунтаар улууһун дьаһалтатын пресс-сулууспата