Ничектер шулай бәхәс килеп чыкты. Кемне – баянчы, кемне гармунчы итеп санау турында иде... — 24 августа 2026 г. в 09:09:17.102
Ничектер шулай бәхәс килеп чыкты. Кемне – баянчы, кемне гармунчы итеп санау турында иде ул. Һәм менә шул чакта берәү кистереп әйтеп куйды: – Ә менә Сафьян Ибраһимовны кем дип исәпләргә соң, алайса?! – диде. – Баянчы итепме? Артист итепме? Композитор итепме? Кайсын гына алып карасаң да, барыбер аз булачак. Әгәр дә кеше кулына музыка уен коралы алган икән, һичшиксез, моң иясе инде ул!.. Ул үзе Казан малае. Әтисе дә, бабасы да Казанда туган, Казанда яшәгән. «Әйе, Казанда үстем, укыдым, шул вакытта сугыш башланды…» – дип сөйләгән иде миңа Сафьян абый. Әнә шул «сугыш башланды…»дигән сүз янәшәсендә «шул вакыттан ук музыкага гашыйк идем» дигәне әллә ничек сәерсендергән иде мине. Аның беренче уен коралы, үзе ясап уйнаганы – тактага беркетелгән корыч кыллар –«мандолина». Ә аннан соң инде аңа базардан авыз гармуны алып кайталар. Бераздан малайның кулына венский гармун, соңыннан баян-аккордеон килеп керә. Театрда эшләгән елларында Сафьян Ибраһимов үзе дә беренче тапкыр җырлар иҗат итә башлый. Дөресрәге, аларның күбесе нәкъ менә аерым спектакльләр өчен язылган җырлар була. «Тагын, тагын, тагын да», «Сине уйлап янам», «Картаямыни соң йөрәк?!» кебек хәзер бик тә популярлашкан җырлар әнә шул елларда туа. Без бит әле һаман да бер сорауга җавап эзләүне дәвам итәбез: каян килә, кайлардан табыла бу кешегә җирдә моң? Сафьян абый исә әлеге сорауны үзе аңлап бетермәгәнгә сабыша. Әллә аны урынсыз-вакытсыз бирелгән сорау дип уйлыймы? – Әтиемнең тавышы бик матур иде, – ди ул, көрсенеп.– Юк, ул җырламый иде, бик тә көйле итеп, матур итеп мәчеттә азан әйтә иде… Әйе, дәүләт күләмендә кимсетелеп тә, әтисе фаҗигасен аңлап-белә торып та, кешеләргә, халыкка, үз халкына ышанычын җуймаган, аңа күңелендә тибрәнгән иң эчкерсез моңнарын өләшә алган кеше чын мәгънәсендә илаһи заттыр ул… Нияз Рәшитов #бу_көн_туган_көн Композитор, Татарстанның атказанган мәдәният хезмәткәре Сафьян Ибраһимов (24.08.1926-14.01.2014).