Кешеләргә килә ышанасым
Кешеләргә килә ышанасым Яши-яши кат-кат алдансам да, Кешеләргә килә ышанасым. Гәрчә күптән беркатлылыгымның Тоемларга кирәк бер чамасын. Тоем юк шул: Гел яхшыга юрыйм Күргән-белгәннәрнең фигыльләрен. Маңгайларга язып куелмагач, Кайдан белим ихлас түгелләрен? Мин сайланмыйм, Гадел тормыш үзе Иләк аша или дусларымны. Ә шулай да, ишекләрем – ачык, Киң корырга күнгән без табынны. Мәрхәмәтле, гадел кешеләргә Ачык тотам күңел бусагасын. Заманыбыз гади түгел, Ләкин,.. Кешеләргә килә ышанасым. (Исхак Фәйзи)
2 942 просмотров