4 октябрьдә Стәрлетамак шәһәр мәдәният сараенда истәлекле очрашу узды. Ике балалар колл...
4 октябрьдә Стәрлетамак шәһәр мәдәният сараенда истәлекле очрашу узды. Ике балалар коллективы — "Дан" театр студиясе (җитәкчесе Айгөл Юлъякшина) һәм "Иркен" үрнәкле гармунчылар ансамбле (җитәкчесе — Башкортстанның атказанган мәдәният хезмәткәре Радик Галимҗанов) очрашты. Әлеге чараны оештыру хакында коллективлар май аенда ук, Уфада "Гармун уйнатыйк әле!" чарасы узган вакытта килешкән иде. Бик җанлы очрашу килеп чыкты. Яшь гармунчылар гармун уйнады, кунак кызлар-егетләр һәм ата-аналар кушылып җырлады, биеде. Кабул итүче як чәй табыны әзерләгән иде. Айгөл Закир кызы "Иркен" коллективына, аның көчле җитәкчесенә, Шәһәр мәдәният сарае җитәкчесе Флюр Садыйковка милли моңнарны саклауда, яшь буынны тәрбияләүдә зур өлеш керткәне өчен рәхмәт әйтте. Ә Радик Иркен улы, үз чиратында, әлеге чараның әһәмиятен билгеләде һәм иҗади дуслыкның дәвамлы булачагына ышанычын белдерде. Әйткәндәй, татар җанлы, сәләтле балалар Уфада эшләп килуче "Дан" театр студиясенә әле дә кушыла ала.