Бүген, бер карасаң – шатлыклы, икенче карасаң – моңсу көн... Татарстан китап нәшриятынд...
Бүген, бер карасаң – шатлыклы, икенче карасаң – моңсу көн... Татарстан китап нәшриятында 25 томлык “Татар халык иҗаты” академик тупланмасының мин әзерләгән барлык томнары да чыгып бетте. Дүрт томны башкарып чыктым мин. XII – XIII томнарда халкыбызның риваятьләре һәм легендалары, XIV–XV томнарда бәетләр урын алды. Моңа кадәр Татарстан фәннәр академиясе системасыннан читтә, хәтта ки бүтән республикада эшләп, академик тупланмаларны әзерләүгә тулаем җәлеп ителгән бер белгеч тә юк иде. Беренчесе булдым. Соңгысы булмам, дип ышаныйк... Томнарны әзерләүдә ярдәм иткән һәркемгә – беренче чиратта, Татарстан Фәннәр академиясенең Г. Ибраһимов ис. Тел, әдәбият һәм сәнгать институтының халык иҗаты бүлеге хезмәткәрләренә, тупланманың фәнни мөхәррирләре, танылган галимнәр Гамирҗан ага Дәүләтшинга (XII–XIII томнар) һәм Тәлгать ага Галиуллинга (XIV–XV томнар), Караидел төбәгенең бай фольклор мирасын түкми-чәчми безнең көннәргә кадәр китереп җиткергән танылган язучы һәм журналист, бер генә томнан да читтә калмаган Заһит абый Мурсиевка (vk.com/id160614394) олы рәхмәтләрем! Син – фольклорның дусты, Заһит абый! Нәрсә дип әйтим, ил-көннәр тыныч булып, академик тупланманың соңгы XXV томы чыгуын да күрергә язсын. Ашаган белми – тураган белә, китапларны әзерләү ифрат катлаулы һәм авыр эш. “Гасырлар тузаны” дигән төшенчә монда материальләшә, күңелләргә генә түгел, авыз-борыннарга, күз-үпкәләргә дә тула. Киләсе томнарны эшләүче коллегаларга рух ныклыгы, тән сәламәтлеге һәм, иң мөһиме, түземлек телим!