Кадерле дусларым! Сезнең белән олы шатлыгымны уртаклашмакчымын! Бөтендөнья татар конгре...
Кадерле дусларым! Сезнең белән олы шатлыгымны уртаклашмакчымын! Бөтендөнья татар конгрессы үткәргән "ИҢ ГҮЗӘЛ КЕШЕ ИКӘНСЕЗ" бәйгесенең җиңүчеләре билгеле булды. Алар арасында Башкортстан республикасыннан да ике укучы бар! Шуларның берсе — Нефтекама шәһәреннән 6 сыйныф укучысы — минем оныгым Ясминә Рафикова. Ул конкурс эшен, татар теле укытучысы Гөлнара Фаат кызы ярдәмендә, минем иҗатымны өйрәнүгә багышладылар. Бәйгегә бик күп төбәкләрдән эшләр җибәрелгән иде. Җиңүчеләр Бөтендөнья татар конгрессының махсус комиссиясе тарафыннан билгеләнде. Барлык таләпләргә җавап биргән, укытучы образын тулысынча ача алган эшләр югары бәяләнде. Безнең Ясминәбез үзе укыган мәктәбен, Нефтекама шәһәрен, Башкортстаныбызны һәм гаиләбезне данлап, икенче урын яулады! Җиңүчеләрне бүләкләү Казан шәһәрендә үтте. Шатлыгыбызның чиге юк!.. Ясминәбезгә укуында зур уңышлар,бәхетләр насыйп булсын! Ә туган телебезгә, милләтебезгә, буыннар бәйләнешенә мәхәббәт тәрбияләгән Гөлнара Фаат кызына алдагы тормышында да зур казанышлар һәм гаилә иминлеге телибез! Ә мин, үз чиратымда, киләчәктә татар теле яшәр, әсәрләребезне оныкларыбыз укыр дип, милләттәшләремне өметләндерәсем килә. Мәсүфә ӘЮПОВА, Татарстан Язучылар берлегенең шәрәфле әгъзасы.