Тыва дыл хүнүнде Тываның күрүне университединиң сургуулдары театрга солун үени эрттирге...
Тыва дыл хүнүнде Тываның күрүне университединиң сургуулдары театрга солун үени эрттиргеннер Тыва дылдың хүнүн таварыштыр, Тываның күрүне университединиң химия салбырының 3-кү курсунуң сургуулдары башкызы Елена Кашкак-биле кады В. Көк-оол аттыг Тыва национал хөгжүм-шии театрынга барып, солун хемчегге киришкеннер. Аныяктар театрның алдарлыг чогаалчызы Эдуард Мижиттиң либреттозунга база композитор Чойгана Комбу-Самданның аялгазынга тургустунган, театрның тургузукчу режиссёру, Тыва Республиканың улусчу артизи Леонид Кан-оолдуң «Чаңгы ынакшыл» деп чараш мюзиклин улуг сонуургал-биле көргеннер. Бо хемчег сургуулдарның төрээн дылынга, культуразынга болгаш уран чүүлүнге ынакшылын быжыглаар сорулгалыг эрттирген. Бо хөгжүмнүг шии Кара биле Седиптиң бүгү шаптыктарны ажып эрткен улуг болгаш күштүг ынакшылының дугайында тоожуп турар. Мюзиклдиң үезинде сургуулдар тыва дылдың бай-байлак болгаш терең уткалыг болуп турарын база катап эскергеннер. Сургуулдар артистерниң ойнап турар салым-чаяанын, маадырларның салым-хуузун болгаш шииниң бедик деңнелге тургустунганын үнелээннер. «Бо хүн чүгле мюзикл көөру эвес, а төрээн дылывыстың эртинезин камнап, ону хүндүлеп чоруурунуң чугулазын база катап сагындырган солун хүн болду. Кара биле Седиптиң ынакшылының төөгүзү бистиң чүректеривисти хамчыпты» — деп, сургуулдар сеткилдериниң өөрүшкүзүн үлешкеннер. Шии соонда аныяктар башкызы-биле кады көрген мюзиклдиң дугайында солун чугааны кылып, сагыш-сеткилдери көдүрлүп чанганнар. Сургуулдар сагыш-сеткилди сергиткен чараш оюн-көргүзүг дээш мюзиклдиң артистеринге база театрның шупту ажылдакчыларынга өөрүп четтиргенин илередип, ажыл-ижинге улуг чедиишкиннерни күзеп турарлар. #ТувГУ #ЕГФ #ТываДыл #Театр
Канал в каталоге Максиметера
7 946 подписчиков · Образование