🔹Августуң 4-те, Даг-Алтайга федералдыг Чазактың Даргазы Михаил Мишустинниң эрттиргени ... — 6 августа 2026 г. в 02:23:19.690
🔹Августуң 4-те, Даг-Алтайга федералдыг Чазактың Даргазы Михаил Мишустинниң эрттиргени туризм болгаш аалчылар хүлээп алырын хөгжүдериниң талазы-биле хуралга Владислав Ховалыг киришкен. Хуралга чурттуң иштики каттышкан продуктузунга туризм адырының үлүүн көвүдедир аргаларны чугаалашкан. Бөгүнде ол 3 хууну тургузуп турар, а 2030 чылга чедир 5 хуу чедирер сорулганы күрүне баштыңы бүгү деңнелдиң эрге-чагыргазынга салган. Президентиниң инициативазы Тываның туризмни экономиканың орулгалыг угланыышкыннарының бирээзи кылдыр дээн шагдан бээр планнары-биле дүгжүп турар. «Тывага стратегтиг чугула угланыышкын бо-дур. Бистиң республикаже турисчи агым чылдан чылче өзүп турар. Күрүнениң, ылаңгыя ИПСЭР таварыштыр, бизнести деткээн боттуг хемчеглери улуг идиглиг болган. Бо ажылдың түңнелдери көскү: амгы үениң аалчылар бажыңнары болгаш турисчи баазалар туттунуп, инфраструктура шапкын хөгжүп турар» - деп, Владислав Ховалыг дыңнаткан. Ийи неделя болгаш Тывага IV-кү делегей чергелиг буддизм форуму Россияның регионнарындан база даштыкы чурттардан муң ажыг аалчыларны хүлээп алыр. Тыва кайгамчык болуушкуннар чокка-ла, онзагай культуразы болгаш кайгамчык бойдус чурумалы-биле туристерни хаара тудуп турар. Бо удаада форумнуң дыка хөй аалчылары болгаш киржикчилери бистиң республикавыска келгеш, ооң ужур-чаңчылдары, культуразы, сүлде-сүзүүнүң ыдыктары-биле бир дугаар таныжып, сонуургаарлар. «Бо чүүл культурлуг харылзааларывысты быжыглаарындан аңгыда, муң-муң чаа аян-чорукчуларга Тываны ажыдар дээрзинге бүзүрээр мен. Бистиң бойдузувус болгаш онзагай культуравыс туристерни хаара тудуптар езулуг сорунзалыг. Республика экономиказының идегелдиг үндезининиң бирээзи апаар аалчылар хүлээп алыр адырны бүгү тала-биле деткиирин уламчылаар бис» - деп, Тываның Баштыңы МАХ-та бодунуң каналынга бижээн.