🔹 «Кайгамчыктыг үре-түңнелдер», - деп, Михаил Мишустин Тываның кадык камгалал системаз... — 5 августа 2026 г. в 08:11:48.544
🔹 «Кайгамчыктыг үре-түңнелдер», - деп, Михаил Мишустин Тываның кадык камгалал системазында эде чаартылгаларның түңнелдерин тайылбырлаан. Республиканың баштыңы Владислав Ховалыг-биле регионнуң консультативтиг-диагностика төвүнге кээп чорда, эде чаартылга программазы-биле чүү кылдынганын федералдыг чазак даргазынга илеткээн. Республиканың кадык камгалал сайыды Анатолий Югай аарыгның баштайгы демдектери көстүп келирге-ле дуза дилээр, чонга кол болгаш эң чоок баштайгы эмнелге звенозунда өскерлиишкиннерни хүндүлүг аалчыларга таныштырган. Чижээ, чаартылга үезинде 21 объектиге улуг септелгени кылып, 12 эмнелге амбулаторияларын база 61 фельдшер-акушер пунктуларын туткан. Республика эмнелге албан черлеринге амгы үениң 700 ажыг санныг дериг-херекселдерин, 85 автомашиналарны, көжүп чоруур 18 ФАП-ты база 5 диагностика комплекстерин садып алган. Кадык камгалал адырында сан-чурагай ажыглалын чедип алыр дээш, идепкейлиг ажыл чоруп турар. Электроннуг эмчи карталары тыптып келген. Күрүне ачы-дузазының порталы таварыштыр эмчиниң шинчилелдерин азы бижиктерин алыры чиик апарган. Телемедицина, кылымал угаанны ажыглаан ачы-дуза анализтерни сайгарарынга дузалап турар. Чурттакчы чон мессенджерлер таварыштыр эмчиниң хүлээп алыышкынынга бижидип алыры медицинаның чедингирин бедиткен. Инфраструктураны экижидеткени, эмчилерниң чаа технологияларны шиңгээдип турары кадыкшыл көргүзүглеринге дорт салдарлыг болган. Чижээ, 5 чыл дургузунда чаштарның өлүп-хораары 37,5 хуу кызырылган, бажынче хан чүгүргеш азы чартыктааш чок болур чоруктар база эвээжээн. Хоралыг ыжык аарыгларын тиилеп үнери көвүдээн. Тускай шериг операциязының киржикчилеринге дуза чедирер системаны тургускан. Кадык камгалал системазын амгы үениң негелделеринге дүүштүрер ажылдар уламчылап турар. Оон ыңай кадык камгалалының 20 объектизин чаартыры, уруглар поликлиникаларынга 270 ажыг дериг-херекселдерни садары планнаттынган. 2029 чылда республиканың уруглар эмнелгезиниң чаа тудуу ажыглалче киирер, ынчалдыр амгы 879 орунга 50 орун немежир. «10 чыл дургузунда септелге херек черлер саны 1,6 катап эвээжеп, шупту эмнелге албан черлерин чурумчутканы эң кол. Кайгамчык үре-түңнел. Кадык камгалалын ам-даа сайзырадыр херек» - деп, Михаил Мишустин Тываның Баштыңы Владислав Ховалыгга чагыын берген.