🔹 «Өг-бүле» национал төлевилелдиң «Өг-бүлеге деткимче» федералдыг төлевилелиниң күүсел... — 27 августа 2026 г. в 09:05:29.096
🔹 «Өг-бүле» национал төлевилелдиң «Өг-бүлеге деткимче» федералдыг төлевилелиниң күүселдези-биле республиканың Чеди-Хөл кожууннуң Ак-Тал суурда база Барыын-Хемчик кожууннуң Кызыл-Мажалык суурда школа назыны четпээн уругларның өөредилге албан черлериниң септелгезин кылган. Уруглар садтарының капиталдыг септелгези дооступ, чаа өөредилге чылында уруглар чаагайжыткан байдалдарда өөредилгезин уламчылаар. Республика 2025 чылдан эгелеп «Өг-бүле» национал төлевилелдиң күүселдези-биле школа назыны четпээн уруглар албан черлеринге капиталдыг септелге кылыр федералдыг программада киржип турар. Ыраккы Мөңгүн-Тайга кожууннуң Мугур-Аксы суурда «Чечек» уруглар садының септелгези – баштайгы шенээн төлевилел ол болган. Бо чылын Кызыл-Мажалык биле Ак-Тал суурларда ийи уруглар садтары эстафетаны хүлээп алган. Уруглар садтарының крышаларын, соңгаларын, хана болгаш шала шывыгларын солуп, иштики шеверлел ажылдарын чорудуп, даштын шып, одалга болгаш чырык системаларын чаарткан. Тываның Өөредилге яамызының дыңнатканы болза, уруглар садтарында тудуг ажылдары доосту бээрге, чаа дериг-херекселди салып, ойнаар шөлдерни тургузуп, албан чериниң чоок-кавызын чаагайжыдар. Өөредилге яамызы ол объектилерде ажылдарны кичээнгейлиг хайгаарап турар. Хыналда үнүүшкүннер бадылаан график езугаар ажылдар чоруп турарын көргүскен, чаарттынган уруглар садтары удавас бичии уругларны хүлээп алырлар. Республиканың школа назыны четпээн уруглар өөредилге системазында 220 уруглар садтары бар, 25 муң ажыг уруглар ында хаара туттунган. Национал төлевилелдериниң ачызында регион өөредилге черлериниң инфраструктуразын доктаамал чаартып турар. Регион «Өг-бүлеге деткимче» федералдыг төлевилелге киришкеш, көдээ черлерде уругларга өөредилгениң чаагайжыткан байдалдарын тургузуп берип турар. Амгы үеде эң-не ырак суурларда безин уруглар чаа дериг-херекселдерге өөренип, сайзырап өзеринге идиглиг бедик шынарлыг ойнаарактар-биле ойнап болур апарган.