🔹Август 30-ниң кежээзинде Кызылга болган улуг орук озал-ондак соонда республиканың Баш... — 1 сентября 2026 г. в 02:55:08.020
🔹Август 30-ниң кежээзинде Кызылга болган улуг орук озал-ондак соонда республиканың Баштыңы Владислав Ховалыг ындыг даалганы берген. Кежээликтей Кочетов кудумчузунда 104 дугаарлыг бажың чоогунда орук кежер черде ногаан светофор хып турда, орук кежип бар чораан беш кижини микроавтобус үстүрген. Орук озал-ондааның түңнелинде, сес кижини айыыл-халап болган черден республиканың 1 дугаар эмнелгезинче эккелген, оларның аразында бажынга кемдээшкин алган 31 харлыг микроавтобус чолаачызы база бар. Тываның Кадык камгалал яамызының дыңнатканы-биле алырга, чолаачы-биле кады дөрт кижиге эмчи дузазын көргүскен соонда, амбулаторлуг хайгааралче чоруткан. Өске дөрт кижини — херээжен кижи болгаш үш уругну эмнелгеге чытттырган. Травматолия салбырында чыттырган уругларның ийизиниң байдалы аар. Эң аар кемдээшкин алган бир харлыг бичии уруг реанимацияда берге байдалдыг, эмчилер ооң амы-тынын камгалаар дээш демисежип турар. 47 харлыг херээжен кижиге эмчи дузазын чедирип турза-даа, ол-ла хүн чок болган. Кызыл чырык хып турда халдып эрткен микроавтобус чолаачызы хенертен бергедей бергеш, машиназын башкарып шыдавайн барганын дыңнаткан. Тываның күрүнениң орук айыыл чок чоруунуң инспекциязының дыңнатканы-биле алырга, 31 харлыг чолаачы пассажирлер аргыштырар категориязы чок турган. Республиканың наркология диспансеринге чолаачының эзирик-элээрин хынаарга, анаа болган. Амгы үеде ону түр када хоругдалче суккан. Тываның Баштыңы Владислав Ховалыг орук озал-ондаандан чок болган кижиниң өг-бүлезинге кажыыдалын илереткен. Пассажирлер аргыштырылгазының адырында профилактиктиг хемчеглер болгаш хыналдаларны доктаамал чорудуп турза-даа, ол ам-даа четпейн турарын дүүнгү айыыл-халап бадыткаанын демдеглээн. Тываның Баштыңы маршрутче үнер транспорттуң техниктиг байдалын база ооң чолаачыларының кадыкшыл байдалынга хыналданы улам күштелдирерин чогуур албан черлеринге дааскан. Республиканың Баштыңы ооң-биле чергелештир бо айтырыгның өске талазын, азы ол кижи биле тура-ла кем-херек үүлгедиишкининче үнүптер болза, кандыг-даа хайгааракчы органнар айыыл-халапты чайладып шыдавазын демдеглээн: «Кажан чолаачылар машина башкарар эргези чок азы эзирик тургаш-ла, руль артынга олуруп алыр болза, өскелерниң амы-тынынга дорт айыылды тургузуп турары ол. Ындыг чүүлдерни болдурбас болгаш, ону агартпас херек» - деп, ол сагындырып, оруктарга айыыл чок чорук ниити харыысалга болур болгаш, өскелерниң талазындан ындыг чурум үрээшкиннерин сойгалаарынче чаңгыс чер чурттугларын кыйгырган. Россияның Истелге комитединиң Тыва Республика талазы-биле истелге эргелели ол орук озал-ондаанга хамаарыштыр РФ-тиң Кеземче хоойлузунуң «Орук шимчээшкининиң дүрүмнерин хажытканы» деп 264 дугаар чүүлү болгаш РФ-тиң КХ-ниң «Айыыл чок чоруктуң негелделеринге дүүшпес ачы-дузаларны көргүскени» деп 238 дугаар чүүлү-биле кеземче херээн оттурган.