🔹2026 чылдың сентябрь 3-тен эгелеп Тывада кожууннар аразының «Кызыл – Суг-Аксы – Кызыл... — 31 августа 2026 г. в 11:08:44.929
🔹2026 чылдың сентябрь 3-тен эгелеп Тывада кожууннар аразының «Кызыл – Суг-Аксы – Кызыл» маршрутка автобус доктаамал халдып эгелээр. Сүт-Хөл кожууннуң чурттакчыларының дилээнге даянгаш, Тыва Республиканың Баштыңы Владислав Ховалыгның даалгазы-биле ындыг шиитпир хүлээп алдынган. «Амыдыралга инфраструктура» национал төлевилелдиң «Хөй-ниити транспортун хөгжүдери» федералдыг программазынга киришкеш, «Ареал» компанияның спонсор деткимчези-биле чаа автотранспортту садып, маршрутту катап халдыдып эгелээн. Чаа маршрут Сүт-Хөл кожууннуң чурттакчыларының аай-дедир аргыжылгазын экижидип, Кызылче доктаамал чоруурун хандырар. «Туваавтотранс» КХН республиканың күрүне бүдүрүлгези аай-дедир аргыштырылганы хандырар. Россияга бүдүрген, 19 пассажирге санаан, «Аврора» деп амгы үениң микроавтобузу маршрутче үнер. Автотранспортту климат-контроль болгаш айыыл чок чорук системалары-биле дерээн болгаш, бүдүн чыл дургузунда таарымчалыг болгаш бүзүрелдиг чорукту ол хандырар. Маршрутту орук ара Чадаана хоорайга доктаарын көрүп турар. Кызылдан машиналар вторник, четверг, улуг-хүнде «Мөңгүлек» остановказындан 16:00 шакта үнгеш, Суг-Аксы суурга 20:30 шакта чеде бээр. Автобустар дедир Суг-Аксыдан понедельникте, средада, пятницада 8:30 шакта үнүпкеш, Кызылга 13:00 шакта келир. «Кызыл – Суг-Аксы» аразының орук өртээ 700 рубль болза, Чадаана хоорайга чедир — 550 рубль болур. 12 хар четпээн уругларга орук өртээ чиигелделиг, бир эвес ийи уруг эдертип чоруур болза, улуг улустуң долу өртээниң 50 хуузу болур. 12 хар четпээн үш азы оон хөй уруглар-биле чорук чоруур болза, үшкү болгаш дараазында уруг бүрүзүнден долу өртекти алыр. Бо маршрутка чүък ап чорууру көрдүнмээн. Регионнуң Транспорт яамызының дыңнатканы-биле алырга, чүгле хол чүъгү чөпшээреттинген, ону пассажир холунга тудуп алыр ийикпе, азы мурнуку олуттуң адаанга салып ап болур. Билеттерни «Мөңгүлек» аалчылар бажыңында кассадан, азы хостуг олуттар бар болза, чолаачының бодундан садып ап болур. Билеттерни баш бурунгаар садып эгелээриниң хүнүн немей чарлаптар. Маршруттуң, билеттерниң бар-чогун, расписаниеде өскерлиишкиннер дугайында тодаргай медээни «Туваавтотранс» КХН-ниң диспетчер албанының +7 (913) 356-08-58 дугаарлыг телефонунче долгааш, билип ап болур. Оон аңгыда, Өвүр кожууннуң Хандагайты суур-биле доктаамал маршрут аргыжылгазын катап эгелээрин сайгарып турар. Чурттакчыларның хереглелин болгаш аргыжылганы организастаарының аргаларын көрүп, айтырыгны шиитпирлээр.