🔹 Владислав Ховалыг Чеди-Хөл кожуунга сургакчылап чорааш, Хову-Аксы суурда социал алба... — 6 сентября 2026 г. в 07:59:29.380
🔹 Владислав Ховалыг Чеди-Хөл кожуунга сургакчылап чорааш, Хову-Аксы суурда социал албан черлериниң болгаш котельнаяның одалга сезонунга беленин хынап, чаа суг алыр черни көрген. Республика Баштыңы хыналданың түңнелинде, белеткел ажылын чедимчелиг доозарынга хемчеглерни алыр дугайында элээн каш даалгаларны яамылар болгаш ведомстволар удуртукчуларынга база кожуун чагыргазының удуртулгазынга берген. Ол чоруп турар үеде, «УК ТЭК 4» КУБ-туң Хову-Аксында участогунда 3 дугаар котелдуң септелгези чоруп турган. Котельнаяның удуртулгазы септелге адакталып турарын, ол одалга сезонун эгелээринге беленин, суурда социал албан черлеринге болгаш чуртталга бажыңнарынга чылыгны саадатпайн бээрин дыңнаткан. Котельнаяны 2013 чылда туткан, ооң ажыглалының үезинде, системаның өйлеп-таарыштырар дериг-херекселинде кылыр чүүлдер бары демдеглеттинген. Бо чайын бүдүрүлге планнаттынган ажылдарның шуптузун кылып дооскан. Кожууннуң кол социал албан черлерин база хөй квартиралыг элээн каш бажыңнарны, ооң иштинде эргижирээн чуртталга бажыңнарындан чурттакчыларны көжүрер программа езугаар чоокта чаа ажыглалче киирген бажыңнарны чылыг-биле ол хандырар. Эрги-даа, чаа-даа хөй квартиралыг бажыңнар чурттакчыларындан эрткен одалга сезонунда квартиралары соок дугайында хомудалдар киргилээн. Владислав Ховалыг кижилерниң чуртталга байдалын боду хынап көөр дээш, аварийлиг бажыңдан өскээр көжүрери планнаттынган квартираларның бирээзинге четкен. Бажың ээлери бирги каът кыжын соок, шалазы доңа бээрин республиканың удуртукчузунга чугаалаан. Тус чер чагыргазынга чаңгыс эвес удаа киирген айтырыын шиитпирлежиринге дузадан кадарын олар дилээннер. Владислав Ховалыг чагырга даргазы Адыгжы Араптанга сентябрьның дургузунда бажыңны чылыглаар ажылды организастап, чорударын дааскан. Ниитизи-биле 10 хире бажыңны чылыглаар херек. Владислав Ховалыг эрги тудугнуң орнунга туткан суг алыр чаа тудугну база көрген. Энергетика болгаш чуртталга-коммунал ажыл-агый сайыды Эдуард Куулар объектиниң ажыглалче кииреринге дериг-херекселдерин өйлеп-таарыштырары арткан деп дыңнаткан. Ынчангаш Новосибирск хоорайдан тускай специалистерни чалаан, олар чоокку хүннерде чедип кээр ужурлуг. Тываның Баштыңы «Аныяктар болгаш уруглар» национал төлевилелдиң «Уругларга бүгү-ле экини» федералдыг төлевилел езугаар эрткен чылын улуг септелгени эрткен Хова-Аксы школазын база хынаан. Чаа өөредилге чылында чаарттынган школага 700 хире уруглар өөренип турар. Владислав Ховалыг кожуунда өөредилге черлериниң удуртукчулары-биле школага ужуражып, республика эрге-чагыргазының деткимчези негеттинип турар айтырыгларны чугаалашкан. Башкылар Хову-Аксы школазында бассейн септелгезин доозары дээш, оон-даа өске айтырыгларны көдүрген. Муниципалитетте септелге ажылдарынга акша-хөреңгизи чедишпейн турар. «Келир чылдың сезон үезинде тудуг ажылдары үе шаанда доозар кылдыр чогуур акша-хөреңгини аңгылаар бис. Дараазында өөредилге чылында бо школага бассейн ажылдаар ужурлуг» - деп, Владислав Ховалыг школага чораан соонда дыңнаткан. Школа соонда Владислав Ховалыг «Узун болгаш идепкейлиг назын» национал төлевилелдиң кадык камгалалының бирги звенозунуң модернизация программазы-биле чаарттынып турар төп кожуун эмнелгезинге доктааган. «Оникс» КХН тудуг чери бирги каъттың септелгезин дооскан, ийиги каътта чаартылгаларны эгелээн. Бо чылдың февральда эгелээн ажылдар ноябрьда доостур ужурлуг. Тываның Баштыңы ажылдарның хуусааларын болгаш шынарын хайгаарап көөрүн Кадык камгалал яамызындан негээн. Владислав Ховалыг хыналда соонда, тус черниң чурттакчыларның чаагай чоруунга хамааржыр сезоннуг ажылдарның белеткелин чогуур үезинде доозары, ол ышкаш ооң шынары кожуун удуртукчуларының харыысалгазында дээрзин база катап сагындырган.