Беларусь Өрөспүүбүлүкэтин киинигэр ыам ыйын 26-29 күннэригэр Минскэй куоракка аан дойду... — 11 июня 2026 г. в 00:36:51.388
Беларусь Өрөспүүбүлүкэтин киинигэр ыам ыйын 26-29 күннэригэр Минскэй куоракка аан дойдутааҕы социальнай үлэһиттэр ассоциацияларын Евразийскай пуорумнара буолан ааста. Бу суолталаах тэрээһиҥҥэ Уус Алданнааҕы нэһилиэнньэ социальнай көмүскэлин кэлим киинин үлэһиттэрэ кыттыыны ыллыбыт. Быйылгы 17-с Евразийскай пуорумҥа Саха сириттэн уопсайа 21 социальнай үлэһит кытынна. Дэлэгээссийэни Социальнай хааччыйыы өрөспүүбүлүкэтээҕи кэлим киинин дириэктэрэ, СӨ социальнай сулууспатын үтүөлээх үлэһитэ Наталья Пахомова салайан илдьэ сырытта. Үрдүк таһымнаах пуорумҥа араас дойдуттан 250 тахса экспиэрт кытынна. Ол курдук, Англия, Казахстан, Узбекистан, Таджикистан, Кытай, Таиланд, Соҕуруу Кэриэйэ уонна Арассыыйа социальнай тэрилтэлэрин, дириэксийэлэрин, ассоциацияларын социальнай үлэһиттэрэ, психологтара, аҕам саастаахтары кытта үлэлиир мэдиссиинэ үлэһиттэрэ кыттан, тус уопуттарын, чинчийиилэрин ырыттылар, социальнай үлэ сайдыытын тула аһаҕастык кэпсэттилэр. Тэрээһин сүрүн сыала-соруга — социальнай үлэҕэ инклюзия, сыыппара бородууксуйаларын табыгастаахтык туһаныы, хардарыта көмөнү сайыннарыы. Бэйэлэрин санааларын уонна бастыҥ үлэ уопутун араас хайысхаҕа үлэлиир исписэлиистэр, ону тэҥэ аан дойдутааҕы тэрилтэлэр – ХНТ, ЮНИСЕФ, Кыһыл Кириэс бэрэстэбиитэллэрэ үллэһиннилэр. Беларусь Өрөспүүбүлүкэтин Үлэ уонна социальнай көмүскэл миниистирин солбуйааччы Марина Артеменко исписэлиистэр идэлэрин үрдэтэн, сонун сүүрээннэри тобулууну, сөбүлэсиһиилэри, атын дойдулары, тэрилтэлэри кытта бииргэ үлэлээһин кыахтарын бэлиэтээтэ. ✍️ Валентина ФЕДОРОВА, Анна БУРНАШЕВА, улуустааҕы социальнай көмүскэл управлениетын исписэлиистэрэ 📲Мах-каналбытыгар сурут ⬇️ https://max.ru/join/3C9ZQLhT3NOAcTqvoqV7q1JihA40sSL8ZGoFY5jwqMU 🌐мюрюгазета.рф ✅ @uamurusahargata @ulusmedia